كریستیانۆ ڕۆناڵدۆی پورتوگالی و یاریزانی مانچستەر یونایتد بەدووری نەزانی ڕۆژێك لە ڕۆژان لە وڵاتی بەڕازیل یاریی بكات و داواشی لە یاریزانەكان كرد ئەوپەڕی توانای خۆیان بەكاربهێنن تا لەم دۆخە قورسە ڕزگاریان ببێت.
ڕۆناڵدۆ پێیوایە ئەم جیلە نوێیە ڕەخنە قبوڵناكات و هەوڵ بۆ چارەسەركردنی كێشەكانیشی نادات.
زۆربەی قسەكانی ڕۆناڵدۆ
– بەرازیل وەك برای پورتوگالییەكان دەبینم، خوشكەكەم لە بەرازیل دەژی و شوویكردووە بە كەسێكی بەرازیلی، ڕۆژانە مامەڵەیەكی زۆر لەگەڵ بەرازیلییەكان دەكەم، ڕێزێكی تایبەتم هەیە بۆ ئەو وڵاتە.
– یاریكردنی من لە بەرازیل شتێكی نامۆ نابێت، كەس نەیدەزانی بە تەمەنی 36 ساڵی دەگەڕێمەوە بۆ مانچستەر یونایتد، بیرۆكەكە جوانە، نازانم، هەموو شتێك لە تۆپی پێدا ڕوودەدات.
– رانینگ پێویستی بە كاتە و متمانەم بەوە هەیە كە سەركەوتووبیت.
– خۆمان دەزانین كە تۆپی پێیەكی باش پێشكەشناكەین، لە هەندێك ڕووەوە لەگەڵ رانینگ پێشكەوتووین، ئاسان نییە گۆڕانكاری لە شێوازی یاریكردن و بیركردنەوەی یاریزانەكان بێتە ئاراوە، پێموایە ڕاهێنەر كارێكی گەورە دەكات.
– لە سەرەتاوە دەمانزانی كارەكەمان ئاسان نییە، ئێمە چووینەتە ساڵێكی نوێوە و دەبێت متمانەمان بەخۆمان هەبێت، هێشتا زۆرمان لەبەردەمدا ماوە
– لە ڕاستیدا گۆڕانكاری لە ڕاهێنەردا كارێكی ئاسان نییە، بەڵام من ئێستاش متمانەم بەوە هەیە كۆتایی وەرز بە ئەنجامێكی باشەوە بێینە دەرەوە
– دڵنیام لەوەی كە بە باشیی یاری ناكەین، بەڵام بە تێپەربوونی كات دۆخەكە دەگۆڕێت.
– مانچستەر یونایتد دەبێت لە پلەی یەكەمدا بێت، یاخود دووەم یان سێیەم، پێموانیە هیچ پلەیەكی تر شایستە بێت بۆی.
– دەبێت ئەو ئەقڵییەتەمان هەبێت كە بە هەموو پلەیەك قایلنەبین.
– دەتوانین كاری باشتر بكەین، دەتوانین شت بگۆڕین، بەڵام من هێشتا یاریزانم و ڕاهێنەر نیم تا گۆڕانكاری دروستبكەم.
– ئەم نەوە نوێیە ڕەخنە قبوڵناكات، خۆشم منداڵم هەیە و دەزانم چۆن بیردەكەنەوە، ئەگەر كەسێك هەیە ئامۆژگاریی من وەرناگرێت، تەنها كاری خۆی بكات و ئەوپەڕی توانای خۆی بەكاربهێنێت بەسە.
– من لێرەنیم بۆ ئەوەی پلەكانی پێنجەم و شەشەم و حەوتەم بەدەستبهێنم، من لێرەم بۆ بردنەوە و بەدەستهێنانی ناسناو.
– ئەگەر ئەقڵییەتی كاركردنمان بگۆڕین دڵنیام زۆر شت بەدەستدەهێنین.
– گەڕامەوە بۆ مانچستەر یونایتد لەپێناو خۆشەویستیی یانەكە نەك پارە.
– پێویستە ڕێگەیەك بدۆزینەوە بۆ چارەسەركردنی كێشەكانمان، دەبێت ئەوە قبوڵبكەین كە ئێمە باشنین.
– كۆڵنادەم، چونكە كۆڵدان بۆ ئەوانەیە كە توانایان لاوازە.
– با ڕاستگۆ بین، ئایا لە پێنج شەش یاریی ڕابردووی مانچستەر یونایتد باش یاریمانكردووە؟ دەبێت كاركردن و شێوەی یاریكردنی خۆمان بگۆڕین.
– هەر یاریزانێك شكۆی هەیە، پێویستە ئەوپەڕی توانای خۆی بەكاربهێنێت، لە خۆمەوە دەستپێدەكەم، ساڵی نوێیە و دەبێت گۆڕانكاری زۆر بكەین.
– سەیری خۆم دەكەم و دەڵێم ڕۆناڵدۆ دەتوانیت چی زیاتر بكەیت و چی خۆت باشبكەیت؟ زۆر بەخێرایی ڕادەكەم لە كاتێكدا هاوڕێكانم ماندوون، پێویستە ڕابكەم لەپێناو هاوڕێكانم.
– پێویستە لەناو خۆماندا یەكگرتووبین و لەپێناو یەكتردا كاربكەین، بۆیە بەم یانەیە دەوترێت مانچستەر یونایتد، پێویستە لەكاتە قورسەكاندا پشتی یەك بەرنەدەین.
