چێوەی هەماهەنگیی شیعەکان دەڵێت، کۆبوونەوەکەی شەوی 9ی ئەم مانگەی ئه‌نجومه‌نى نوێنه‌ران و هەڵبژاردنی دەستەی سەرۆکایەتیی ئه‌نجومه‌نه‌كه پێشێلکارییە، بۆیە لە دادگای فیدراڵی سکاڵا تۆمار دەکەن.
شه‌وى ڕابردوو سه‌ركرده‌كانى چێوەی هەماهەنگیی شیعەکان لە ماڵی هومام حەمودی کۆبوونەوە، به‌پێی ڕاگەیەندراوی کۆبوونەوەکەش، “ئەنجامه‌كانی یەکەم کۆبوونەوەی ئه‌نجومه‌نى نوێنه‌ران هیچ بنەمایەکی یاسایی و دەستووریی نەبووە، بۆیە بۆ چارەسەرکردنی ئەو گرفتە گەورانەی لە کۆبونەوەكه‌دا ڕوویاندا، لە دادگای فیدراڵی سکاڵا تۆمار دەکەین”.
باسیان له‌وه‌شكردووه، “ڕێکاری پڕكردنه‌وه‌ى پۆستە دەستوورییەکان به‌و شێوه‌یه ڕاستنەبوو، بووەهۆی سەرەتای قەیرانێکی نوێ، کە ڕێگریی دەکات لە هەموو هەوڵێکی حکومەت و ئه‌نجومه‌نى نوێنه‌ران بۆ وەڵامدانەوەی داواکارییەکانی هاوڵاتییان و باشترکردنی ژیانیان”.
چێوەی هەماهەنگی دەشڵێت، “بونیادنانی دۆخێکی سیاسیی هاوسەنگ و ئارام بە پاراستنی یەکێتیی ناوخۆیی، جێبەجێکردنی دەستوور و هەڵوێستی سیاسی دەبێت، ئەوەش وادەکات لایەنەکان متمانە لەنێوانیادا هەبێت و ڕووبەڕووی ئەو مەترسییانە ببنەوە کە بۆ وڵات دێنە پێش”.
جه‌ختیشیان كردووه‌ته‌وه، تائێستاش باوەڕیانوایە گفتوگۆی ڕاستەوخۆ لەسەر پرسە نیشتمانییەکان تاکە ڕێگایە بۆ دەربازبوون لە قەیرانەکان”.
