ڕاهێنەری یانەی ڤیاڕیاڵ، ئونای ئیمیری لەبارەی هەڵەی داوەرانی لالیگاوە بەتوندی وەڵامی جێرارد پیکێی بەرگریکاری یانەی بەرشلۆنە دەداتەوە، جێرارد پیکێش بابەتی ڕیمۆنتادای بیردەخاتەوە.
دوای ئەوەی پیکێ داوەری ڕووبەڕووبوونەوەی نێوان ڕیاڵ مەدرید و ڤالێنسیای بە هەڵەکار وەسفکرد و لە تۆڕە کۆمەڵایەتییەکانەوە ئاماژەی بەوەکرد، کە لایەنگریی بۆ یانەی شاهانە کردووە.
ئونای ئیمیری ڕاهێنەری یانەی ڤیاڕیاڵ، لەبارەی تۆمەتەکانی پیکێ-وە لە کۆنگرەیەکی ڕۆژنامەوانیدا ڕایگەیاند، “لە یاریی نێوان ئێمە و بەرشلۆنە، شایەنی پەناڵتییەک بووین بەوهۆیەی تۆپ بەردەستی پیکێ کەوت، بەڵام دوێنێ ناوبراو پۆستێکی کردووە و لەبارەی داوەری یاریی نێوان ڕیاڵ و ڤالێنسیاوە قسەیکردووە”.
لە وەڵامی لێدوانەکەی ئیمیری-دا، پیکێ لە تۆڕە کۆمەڵایەتییەکان پۆستێکی ڕووبەرووبوونەوەی ڕیمۆنتادای (6-1)ی بەرشلۆنە و پاریسی بڵاوکردووە و نووسیویەتی: ئەم کەسە سێ ساڵ لەمەوبەر لەبارەی داوەرانەوە بێزاری دەردەبڕی، کۆتایی پێبهێنە ئونای”.
ئونای ئیمیری ڕاهێنەرێکی ئەزمووندارە، لە ڕیمۆنتادای 6-1 ڕاهێنەری یانەی پاریس سان جێرمان بوو، دوای یارییەکە لەبەردەم سەرجەم میدیاکاندا جەختی لەوەکردەوە، کە داوەری یارییەکە ستەمی لە یانە فەرەنسییەکەی کردووە.
