بەرپرسانی ئەمنیی ئوسترالیا، ڕێگەیان لە نۆڤاك جۆكۆڤیچی سڕبی گرتووە بچێتە ناو خاكەكەیانەوە، بەهۆی ئەوەی ناوبراو پشكنینی كۆرۆنای پێ نییە كە بیسەلمێنێت نێگەتیڤە، ئەوە جگە لەوەی ڤاكسینیشی وەرنەگرتووە.
جۆكۆڤیچ، كە لە پێشەنگی ڕیزبەندیی یاریزانەكانی تێنسی سەرزەوی دێت، بۆ بەشداری كردن لە پاڵەوانێتیی ئوسترالیای كراوە گەیشتە ئەو وڵاتە، بەڵام لەلایەن پۆلیسی ئوسترالیاوە دەستبەسەركراوە و ڕێگە بە چوونەناوەوەی بۆ خاكی ئوسترالیا نادرێت.
”نۆلی” یەكێكە لەو یاریزانانەی كە تا ئێستا هیچ ڤاكسینێكی لەخۆی نەداوە، جگە لەوەش پشكنینی كۆرۆنای پێنەبووە كە بیسەلمێنێت تووشبووی كۆرۆنا نییە.
سەرۆك وەزیرانی ئوسترالیا وتویەتی، یاسا بۆ هەموو كەسێك وەك یەكە و هیچ كەسێكیش لە سەروو یاساوە نییە.
بڕیارە ئەمڕۆ پێنجشەممە جۆكۆڤیچ بگەڕێنرێتەوە بۆ سڕبیا و لە ئوسترالیا دووربخرێتەوە.
