کەتایبی حزبوڵڵای عێراق لەبارەی بڕیارەکەی دادگای فیدراڵیی عێراقەوە بۆ پەسەندکردنی ئەنجامی هەڵبژاردنەکان ڕایگەیاند، “بڕیارەکە لەلایەن باڵیۆزخانەی ئەمریکاوە دراوە و لەژێر فشاردا بووە”.
لە ڕاگەیەندراوێکدا حزبوڵڵای عێراق دەڵێت، “دادگای فیدراڵی بۆ بڕیاردان لەسەر ئەنجامی هەڵبژاردن، لەژێر فشاری ئەمریکا و جێنین پلاسخارتدا بووە و بە ناچاری پێیانپەسەندکرد”.
حزبوڵڵا سەرەڕای ڕەتکردنەوەی بڕیاری دادگا و بەشدارینەکردنی لە حکومەتدا ڕایگەیاندووە، “ڕووداوەکانی هەڵبژاردنی عێراق، گەورەترین ساختەکاریی مێژووی عێراقن”.
لەبارەی پێناسەی دادگای فیدراڵییەوە حزبوڵڵای عێراق وتوویەتی، “کەسانێک کە مافی عێراقییەکانیان بەبارمتەگرتووە لەژێر کاریگەریی هاوپەیمانیی شەیتانیی سعودی – ئەمریکی – زایۆنیدان”.
دوێنێ دادگای باڵای فیدراڵی ئەنجامەكانی هەڵبژاردنی ئەنجومەنی نوێنەرانی عێراقی پەسەندكرد.
بڕیاری پەسەندكردنی ئەنجامەكانی هەڵبژاردن لە كۆبوونەوەیەكدا درا كە دوێنێ دادگای باڵای فیدراڵی ئەنجامیدا و تیایدا سكاڵاكەی هاوپەیمانیی فەتحی ڕەتكردەوە كە داوای هەڵوەشاندنەوەی ئەنجامەكانی هەڵبژاردنی كردبوو.
