یانەی ڕیاڵ مەدرید لەم وەرزەدا ئاستێکی بەرزی پێشکەشکردووە، بەڵام بەهۆی ململانێیان لەگەڵ یانەی ئیشبیلیە، ناچاردەبن پاڵپشتی هاندەرانی یانەی بەرشلۆنە بکەن.
بڕیارە سبەینێ سێشەممە، لە یاریگای سانچێز پێزخوان یاریی دواخراوی هەفتەی چواری خولی ئیسپانیا لەنێوان یانەکانی بەرشلۆنە و ئیشبیلیە ئەنجامبدرێت، بردنەوەی بەرشلۆنە لەو یارییەدا لە بەرژەوەندیی یانەی شاهانەیە، بەپێچەوانەوە بەرامبەر ئیشبیلیە دەکەونە نێو ململانێیەکی قورسەوە.
ڕیاڵ مەدرید لەئێستادا بە 43 خاڵەوە لە پلەی یەکەمی ڕیزبەندیی یانەکانی لالیگادایە، لە بەرامبەردا ئیشبیلیە بە 37 خاڵەوە لە پلەی دووەمدایە و ئەگەر بەرامبەر بارسا بردنەوە بەدەستبهێنێت دەگاتە 40 خاڵ، بەوشێوەیەش جیاوازییان لەگەڵ یانەی ڕیاڵ مەدرید بۆ سێ خاڵ کەمدەبێتەوە کە ئەنجامی یەک یارییە.
لەلایەکی دیکەوە یانەی ڕیاڵ مەدرید بەجیاوازی 16 خاڵ پێش بەرشلۆنە کەوتووە، واتا لەو یارییە گرنگەدا هاندەرانی ڕیاڵ مەدرید ناچاردەبن پاڵپشتی کەتەلۆنییەکان بکەن، تاوەکو جیاوازییان لەگەڵ ئیشبیلیە بە شەش خاڵ بمێنێتەوە، لەکاتێکدا بردنەوەی بارسا هیچ زیانێکیان لێنادات و سوودێکی ئەوتۆی نابێت لە کەمکردنەوەی مەودای نێوان دوو یانەکە.
