ئەنجومەنی سوریای دیموکراتی “مەسەدە” بە مەرج ئامادەیی دەربریووە بۆ گفتوگۆکردن لەگەڵ حکومەتی سوریا و دەشڵێت، ڕووسیاش جدییە لە پشتگیریی گفتوگۆی نێوان هەردوولا.
لە ڕاگەیەندراوێکدا “مەسەدە” ئاشکرایکرد، ئەگەر حکومەتی سوریا دان بەوەدا بنێت، کە ئیدارەی خۆسەری دیموکراتی فەرمییە، ئەوا دانوستانەکان دەستپێدەکەن و ئەمریکا و ڕووسیاش ئاگادار دەبن.
لەسەر هەمان پرس، مەسەدە ئاشکرایکردووە، “ڕووسیا و ئه‌مه‌ریكا سه‌باره‌ت به دانوستانه‌كه هه‌ڵوێستی “جدی” و “ئیجابی”یان ده‌ربڕیووە و ئامادەن پشتگیری چارەسەری سیاسی بکەن”.
پێشتر شاندی مەسەدە لەگەڵ سێرگی لاڤرۆڤ، وەزیری دەرەوەی ڕووسیا و بەرپرسانی وەزارەتی دەرەوەی ئەمریکا کۆبوونەتەوە و پرسی چارەسەری سیاسییان بۆ ڕۆژئاوای کوردستان خستەوەتەڕوو.
ئێستاش شاندێکی مەسەدە لە وڵاتانی ئەوروپایە بۆ پرسی پشتگیری ئەوروپا لە ئیدارەی خۆسەری دیموکراتی و تا ئێستا بەپێی ڕێککەوتنێک حکومەتی نوێی سوید ئامادەیی هاوکاری ڕۆژئاوای کوردستانی دەربڕیووە.
