عەلی حەمەساڵح ئەندامی پەرلەمانی کوردستان، داهاتی مانگی تشرینی دووەمی هەرێمی کوردستانی بۆ مووچە بەراورد بە مانگی شوباتی ئەمساڵ خستەڕوو، ڕایگەیاند، کێشەی مووچە نەناردنی 200 ملیارەکە نییە، بەڵکو دەستبەسەرداگرتنی داهاتی ناوخۆ و نەگەڕاندنەوەیەتی.
لە کۆنگرەیەکی ڕۆژنامەوانیدا عەلی حەمە ساڵح ڕایگەیاند، ئەوەی تائێستا دابەشکراوە بۆ مووچە 535 ملیار دینارە، کە نزیکەی 515 ملیاری داهاتی نەوتە (350 ملیۆن دۆلار)، لەهەر بەرمیلێک 27 دۆلار گەڕاوەتەوە بۆ دابەشکردنی مووچە، داهاتی ناوخۆش هیچی نەگەڕاوەتەوە.
وتیشی، 15ی مانگی کانوونی یەکەمە و هێشتا داهاتی ناوخۆی مانگی تشرینی دووەمی هەولێر، سلیمانی و دهۆک نەگەڕێنراوەتەوە بۆ دابەشکردنی مووچە، “کوێی ڕەوایە ئەگەر سلێمانی داهات نەنێرێتەوە، هەولێر و دهۆکیش بڵێین نایگەڕێنینەوە، بەهەموویان میللەت سزادەدەن”.
عەلی حەمەساڵح داهاتی مانگی تشرینی دووەمی بە مانگی شوباتی ئەمساڵ بەراورد کردووە، “لە 24ی شوبات 374 ملیار دینار داهاتی ناوخۆ دراوە بە مووچە، بەڵام لە مانگی تشرینی دووەم، دوای 45 ڕۆژ، کەمتر لە 20 ملیار دینار گەڕێنراوەتەوە”.
بەوتەی ئەو پەرلەمانتارە، “لە مانگی شوباتدا داهاتی ناوخۆی سلێمانی بۆ مووچە 161 ملیار دینار بووە، بەڵام ئێستا سفرە، داهاتی هەمان مانگی هەولێر و دهۆک 213 ملیار دینار بووە، بەڵام بۆ ئێستا کەمترە لە 20 ملیار دینار”.
بۆیە عەلی حەمەساڵح جەختیکردەوە، “ئەوەی هۆکارە لە دابەشنەکردنی مووچە ئەو 374 ملیار دینارەیە کە داهاتی ناوخۆ بووە بۆ مووچە، بەڵام ئێستا کە لە 15ی مانگداین، داهاتی ناوخۆ بۆ مووچە سفرە و نەگەڕێنراوەتەوە”.
بۆیە دوودڵ نەبوو لەوەی بڵێت، “ئەمە دوو ئیدارەییەکی تەواوە”.
عەلی حەمەساڵح دۆخەكەی وا وەسفكرد، كە “ئەمە یان دەستبەسەرداگرتنی داهاتە، یان موماتەڵەکردنە بۆ دواخستنی مووچە تا 25ی مانگ و دواتر لەگەڵ ئەم مانگەدا لە یەکبدرێت و بەداهاتی نەوتی مانگی كانوونی دووەم مووچە تەواوبکرێت”.
بۆیە داوایکرد فشاری جددی و توند بکرێت، بۆئەوەی داهات بگەڕێنرێتەوە و هەموو شتێک نەبەسترێتەوە بە 200 ملیارەکەی بەغدادەوە، بەو پێیەی “بە 374 ملیار دیناری ناوخۆ و هەر بەرمیلێک نەوت 27 دۆلار، کە تەنها بۆ مووچەن، دەتوانرێت بەبێ کێشە مووچەی فەرمانبەران دابەشبکرێت”.
