بەڕێوەبەرایەتی پۆلیسی پارێزگای کەرکوک ئاشکرایکرد، ژنێکیان دەستگیرکردووە، کە لەگەڵ هاوسەرەکەی بکوژی پیاوێکی چەمچەماڵین.
بەپێی ڕاگەیەندراوێک کە وێنەیەکی بۆ تۆڕی میدیایی ئێستا نێردراوە تێیدا هاتووە، ” ژن و پیاوێک لە چەمچەماڵەوە لەگەڵ کەسێکدا سەرکەوتوون و لەسەر ڕێگای کەرکوک ــ بەغداد(حولی) تەقەیان لەو کەسە کردووە و کوشتویانە”.
زانیارییەکانی پۆلیس ئەوە ئاشکرادەکەن، ژنێکی 30 ساڵان (بەڕەگەز عەرەب) دەستگیرکراوە وەک بکوژی پیاوە چەمچەماڵییەکە و دانی بەوەداناوە، کە ئەو تەقەی کردووە.
هاوسەری ئەو ژنە بکوژەش کە پۆلیس بەدوایدا دەگەڕێت بەشداری کوشتنەکەی کردووە و لەلایەن پۆلیسەوە داواکراوە.
ئەو پیاوە چەمچەماڵییە کە دوێنێ کوژرا، خێزاندارە و باوکی پێنج منداڵە، بەڵام تا ئێستا بەفەرمی لەلایەن پۆلیسەوە هۆکاری کوشتنەکەی دیاری نەکراوە.
