پێشمه‌رگه و سوپاى عێراق بۆ ڕاوەدوونانی چەکدارانی داعش، لە زنجیرە چیاکانی کفری و خورماتوو، ئۆپەراسیۆنیان دەستپێکرد.
وه‌زاره‌تى پێشمه‌رگه له ڕاگه‌یه‌ندراوێكدا ئاماژه‌ى به‌وه‌كردووه، ئەمڕۆ لە هەردوو میحوەری یەکی گەرمەسێر و دووی قەرەتەپە، هێزەکانی پێشمه‌رگه بەمەبەستی دوورخستنەوەی مەترسییەکانی تیرۆریستانی داعش و لەناوبردنی مۆڵگەکانی تیرۆریستان، ئۆپەراسیۆنێکی کێوماڵکردنیان لەو ناوچانەدا ئەنجامدا، کە دەکەونە ناوچەی بایەخپێدراوی ئەمنیی هاوبەش لەنێوان هێزەکانی پێشمەرگە و سوپای عێراقی.
لە میحوەری گەرمەسێرەوە هەریەک لە لیواکانی (3 و 5)ى پیادە و لە میحوەری دووی قەرەتەپەشه‌وە لیواکانی (17 و 9)ى پیادەی سەر بە وەزارەتی پێشمەرگە، لەگەڵ چەند یەکەیەکی هێزەکانی 70، بەشداریی تێدا دەکەن.
بەپێی ڕاگه‌یه‌ندراوه‌كه‌ى وه‌زاره‌تى پێشمه‌رگه، “ئەم ئۆپەراسیۆنە بەردەوامدەبێت تا بەتەواوەتی کێوماڵی ناوچەکە دەکرێت”، ڕاشیگه‌یاندووه، ئۆپەراسیۆنی هاوبەشی نێوان پێشمەرگە و سوپای عێراق، لە چێوەی ئەو ڕێککەوتنانە دێت، کە پێشتر کراون.
