بافڵ جەلال تاڵەبانی ڕایگەیاند، دوای هەشت کاتژمێر کۆبوونەوە لەگەڵ نوێنەری خوێندکاران گوێیان لە داواکارییەکان کردووە و میکانزمێک دەدۆزنەوە بۆ چارەسەری کێشەکان.
بافڵ جەلال تاڵەبانی لەدوای کۆبوونەوەی لەگەڵ نوێنەری خوێندکاران ڕایگەیاند، “گوێمان لە هەموو داواکارییەکانیان گرتووە و ئەوان هەموو داواکارییەکانیان ڕەوایە، بۆیە زیاتر بەدەم ئەو کێشانەوە دەچین”.
بافڵ جەلال تاڵەبانی ئاماژەی بەوەشکرد، “دەبوو حکومەت باشتر ئاگاداری کێشەی خوێندکاران بێت، بەڵام ئێمەش لە حزب چارەسەرێک دەدۆزینەوە و گوێمان لە هەموو داواکارییەکان گرتووە”.
سەبارەت بە چاکسازییەکانی ناو یەکێتیی نیشتمانیی کوردستان، بافڵ جەلال تاڵەبانی ڕایگەیاند، “چاکسازییەکان بەردەوامە و حزب هەڵساوەتەوە و زیاتریش هەڵساوەتەوە”.
سەبارەت بە کوژرانی موراد کانی کوردەیی بافڵ جەلال تاڵەبانی ڕایگەیاند،”هەر کەسێک بکوژرێت و هەر حزبێک بێت پێمان ناخۆشە، یەکێتی بێت یان هەر کەسێکی دیکە بێت، بە فەرمی داوام لە قوباد تاڵەبانی کردووە لیژنەی لێکۆڵینەوە ئامادەبکات لەسەر ئەو بابەتە، بۆمان دەرکەوێت هەر کەسێک نایاسایی کوژراوە دڵنیابن لێکۆڵینەوەی خۆمان دەکەین.”
