كۆمسیۆنی هەڵبژاردنەكانی عێراق بڕیاری دەسەڵاتی دادوەری دووپاتدەكاتەوە بە ڕەتكردنەوەی ئەنجامەكانی هەڵبژاردنی ئەو وێستگانەی دەنگی دووبارەیان تێدا بووە، دوای ئەو ڕێكارە، 15 كاندیدی نوێ سەركەوتنیان مسۆگەر كردووە، دووانیان یەكێتین و دەچنە شوێنی دوو كاندیدی پارتی.
عیماد جەلیل، ئەندامی تیمی ڕاگەیاندنی كۆمسیۆنی هەڵبژاردنەكانی عێراق بە میدیاكانی عێراقی ڕاگەیاندووە، كۆمسیۆن ئەنجامی ئەو وێستگانەی ڕەتكردووەتەوە كە دەنگ و پەنجەمۆری دووبارەیان تێدا بووە، یان ئامێرەكانی دەنگدان گرفتیان تێدا بووە.
ئەندامەكەی كۆمسیۆنی هەڵبژاردن جێبەجێكردنی بڕیارەكانی دادگای لەلایەن كۆمسیۆنەوە دووپاتكردەوە.
دوێنێ دەستەی دادوەری سەركەوتنی 15 كاندیدی چەند لایەنێكی جیاوازی عێراقی ڕاگەیاند، كە هەشتیان سەر بەو لایەنە شیعییانەن كە ئەنجامەكانی هەڵبژاردنیان ڕەتدەكردەوە، حەوتی دیكەشیان سەر بە لایەنەكانی دیكەن.
دووان لەو كاندیدە دەرچووانە كاندیدی یەكێتین، كە بریتین لە هەرێم كەمال ئاغا لە هەولێر، هەروەها ڕۆنزی زیاد سەیدۆ لە موسڵ، كە شوێنی دوو كاندیدی پارتییان گرتووەتەوە.
بەمەش كورسییەكانی پارتی دیموكراتی كوردستان بۆ 31 كورسی دابەزی و ئەوانەی یەكێتی بۆ 18 كورسی بەرزبوونەوە.
