وەزارەتی بەرگریی پۆڵەندا دەڵێت، شەوی ڕابردوو گروپێكی پێكهاتوو لە نزیكەی 100 كۆچبەری دەستگیركردووە، كە هەوڵیان دابوو بەشێوەی نایاسایی لە بیلاڕوسیاوە بچنە خاكی وڵاتەكەیەوە.
وەزارەتەكە لە ڕاگەیەندراوێكدا لە تویتەر ئاشكرایكرد، ئەو كۆچبەرانە هەوڵیان داوە سنوور ببەزێنن لە دەوروبەری گوندی دوبیچی سێرگیڤنی، ئەندامانی هێزی تایبەتی بیلاڕوسیاشی تۆمەتباركرد بەوەی سەرۆكایەتی هەوڵی دزەكردنەكەیان داوە.
وەزارەتەكە چەند دیمەنێكیشی بڵاوكردەوە كە كۆچبەرە ڕاگیراوەكان دەردەخەن.
ڕێگرییەكە لەكاتێكدایە تائێستا هەزاران كۆچبەر كە زۆرینەیان كورد، عێراقی و خەڵكی وڵاتانی خۆرهەڵاتی ناوەڕاستن، لە سنوورەكانی نێوان بیلاڕوسیا و پۆڵەندا گیریانخواردووە و چاوەڕوانی هەلی پەڕینەوەن بەرەو وڵاتانی ئەوروپا، بەڵام بڵاوەپێكردنی هەزاران سەربازی پۆڵەندی ئەگەرەكانی پەڕینەوە و گەیشتن بەو خواستەی ئەستەم كردووە.
