لە قۆناغێكدا كە كوردستان لەژێر داگیركاریی دوو ئیمپراتۆرییەتدا كەوتبووەژێر هەڕەشەی لەناوچوونی شوناسەوە، شارێك لەلایەن دەسەڵاتێكی كوردیی خۆكردەوە دامەزرێندرا و هەر لە سەرەتاوە بە بەراورد بە سەردەمی خۆی، ئەدگاری شار لە سیمایدا دەدرەوشایەوە، سلێمانی، شارێك كە لە ساڵی 1784دا لەلایەن ئیبراهیم پاشای بابانەوە دروستكرا و كرا بە پایتەختی میرنشینی بابان.
دامێنی هەردوو چیای گۆیژە و ئەزمەڕ بەدیوی خۆرئاوادا، هاوشێوەی كەش و سروشتە تۆپۆگرافییەكەی كە زستانی سارد و ڕەشەبای بەهێز خۆیان بەسەردا داسەپاندووە، بوو بە مەڵبەندی لەدایكبوونی شارێك كە لە زۆر قۆناغی تەمەنیدا شانۆی ڕووداوگەلی گەرم و باهۆزی گۆڕانكاریی سیاسی بووە، بەتایبەت لە سەدەی بیستەم و ئەو دوو دەیەیەی لەم سەدەیە ڕابوردوون.
شۆڕشی شێخ مەحمودی حەفید و دامەزراندنی چەندین پارت و بزاوتی سیاسی، ڕووناكبیری و كۆمەڵایەتی لەم شارەوە سەریانهەڵداوە و لە نیوەی دووەمی سەدەی ڕابردوودا، سلێمانی ڕۆڵێكی سەرەكیی هەبووە لە ڕەنگڕێژكردنی ژیانی سیاسی و ڕووناكبیری و كۆمەڵایەتیی كۆمەڵگەی باشووری كوردستاندا، بەجۆرێك كە خاوەنی چەندین دەستە و گروپ و قوتابخانە و ڕێبازی هزری و فەرهەنگی و ئەدەبی بووە و بووەتە جێگەی كۆبوونەوەی زۆربەی سیاسەتوان، ئەدیب و شاعیر و نووسەری كوردی ئەو سەردەمە كە نمایندەی ڕێبازە سیاسی و ئەدەبی و ڕۆژنامەگەرییەكان بوون.
لەو قۆناغەشدا كە بە “دوای ڕاپەڕینی خەڵكی باشووری كوردستان” پۆلێن و قۆناغبەندی كراوە، سلێمانی پێشەنگی بزاوت و چالاكییە سیاسی و كەلتووری و میدیاییەكان بووە، وەك دروستبوونی پارتی سیاسی و گروپی ئەدەبی و هونەری و دەرچوواندن و دامەزراندنی چەندین ڕۆژنامە و گۆڤار و دامەزراوەی تری میدیایی و ناوەندی ڕووناكبیری و تیپی شانۆیی و مۆسیقی، تەنانەت لە هونەرەكانی گۆرانیوتن و بەرهەمهێنانی دراما و فیلمدا سلێمانی ڕۆڵی دیاری هەبووە لە كەمەندكێشكردنی باشووری كوردستان بەرەو ئەو بوارانەی سەردەم، چالاكی و هەوڵگەلێك كە ناسناوی “پایتەختی ڕۆشنبیری”یان بە شارەكە بەخشی و لەلایەن یونسكۆوە بە یەكێك لەو شارانەی جیهان كە بە “شاری داهێنان” ناسراون، ناوزەد و دەستنیشانكرا.
ئێستاش لە یادی 237 ساڵەی دامەزراندنیدا، وادەردەكەوێت چاوەكانی چاوەڕوانی لەسەر ئەوە بن، شارێك كە بە پایتەختی میرنشینێك دەستیپێكرد و خۆی گەیاند بە ناسناوی “پایتەختی ڕۆشنبیری”، لە داهاتووی نزیك و ئاییندەی دووردا بەكوێ دەگات؟
