بەرێوەبەرایەتیی گشتی هاتوچۆی عێراق بڕیاریدا لە هەفتەی داهاتووەوە ئۆتۆمبێلە بێسەرەتاکان تۆمار بکات و پرۆسەکەش ماوەی دوو مانگ بەردەوامبێت.
عەمید حەیدەر کەریم، بەڕێوەبەری ڕاگەیاندن و پەیوەندییەکانی بەرێوەبەرایەتیی هاتوچۆی عێراق بە میدیای فەرمی عێراقی وتووە، بەبڕیاری بەڕێوەبەری گشتی هاتوچۆ بڕیاڕدراوە لە سێشەممەی داهاتووەوە دەستبكەن بە تۆماركردنی ئەو ئۆتۆمبێلانەی کە بێ ژمارە و بێسەرەتان.
ڕوونیشیكردووەتەوە، تۆمارکردنەکە ماوەی دوو مانگ دەخایەنێت و ئەو ئۆتۆمبێلانەش دەگرێتەوە کە هیچ پێشینەیەکیان لەلای هاتوچۆ نییە.
بەڕێوەبەرەكەی هاتوچۆی عێراق ، ئاشكراشیكردووە ئەو ئۆتۆمبێلانەشی کە لە ئێستادا دەستیان بەسەرداگیراوە خاوەنەكانیان دەتوانن تۆماری بكەن و دواتر ئازاد دەکرێن.
