ئەمیری کۆمەڵی ئیسلامی کوردستان ڕایگەیاند، فەرەنسا خۆی لە چەندین لاوە لە کێشە و قەیراندایە و ماکرۆنیش لەبری چارەسەر، قەیرانەکانی قوڵتر کردووەتەوە و ماستاوکردن بۆ فەرەنسا و ئەمریکا و وڵاتانی دیکە کەس ناگەیەنێت بە هیچ.
ئەمیری کۆمەڵی ئیسلامی کوردستان لە باسی ئەو کاردانەوانەی لە هەرێمی کوردستان هەبووە لەبارەی ئەو دۆخەوە کە دروست بووە ڕایگەیاند، “ئەوانەی سەردانی كونسوڵخانەی فەرەنسایان كرد تەنها بۆ خۆدەرخستن و خۆبردنە پێشەوە چوونەتە کۆنسوڵخانەی فەرەنسا و دەڵێن ئێمە پشتگیری فەرەنسا دەکەین چونکە پشتگیری کردن لە فەرەنسا واتە پشتگیریکردن لەو بێڕێزییەی بەرامبەر پێغەمبەر و ئیسلام کراوە، بۆیە ئەوانە بەو کردەوەیەیان گومانیان لەسەر موسڵمان بوونی خۆیان دروست کرد، چونكە وڵاتێك بێرێزی بەرامبەر بە پێغەمبەرەكەت بكات و تۆش بچیت پشتگیری لێبكەیت نازانم ئەمە چ واتایەكی هەیە”.
وتەکانی عەلی باپیر، ئەمیری کۆمەڵی ئیسلامی کوردستان لە کاتێکدایە سەرۆکی فراکسیۆنەکەی لە پەرلەمانی کوردستان یاداشتێکی نیگەرانی دابووە کونسوڵخانەی فەرەنسا لە هەرێم و دواتر چەند پەرلەمانتارێکی دیکە سەردانی کونسوڵخانەکەیان کرد و پێچەوانەی یاداشتەکە لەگەڵ کونسوڵی فەرەنسا کۆبوونەوە.
