چەند کاتژمێرێکی کەم دوای کۆتاییهاتنی پرۆسەی دەنگدان بۆ هەڵبژاردنی پێشوەختەی ئەنجومەنی نوێنەرانی عێراق، لە شاری کەرکوک گشت تابلۆ و پۆستەرەكانی تایبەت بە بانگەشەی هەڵبژاردن لابران.
ئەم دیمەن و شەقامانەی لە وێنەكاندا دەبینرێن، تا دوێنێ تەنرابوون بە وێنە و تابلۆ و پۆستەری ڕیكلامكردن بۆ لیست و كاندیدەكانی هەڵبژاردن، بەڵام دوای كەمتر لە 24 كاتژمێر لە كۆتاییهاتن بە پرۆسەی هەڵبژاردن، هەموو كەرەستەكانی تایبەت بە بانگەشە لابراون و هیچ تابلۆ و پۆستەرێکی بانگەشەیان لێنەماوە.
لە شاری كەركوك پۆستەر و تابلۆكانی بانگەشەی هەڵبژاردن بەشێکیان لەلایەن كاندیدەكان خۆیانەوە لابراون و بەشێکی تریشیان بەهۆی ئەوەی لە ئاسن دروستکرابوون و نرخی ئاسن ئێستا بەرزبووەتەوە، هاوڵاتییان لێیانكردوونەتەوە و بردوویانن بۆ خۆیان.
لقی کەرکوکی کۆمسیۆنی باڵای سەربەخۆی هەڵبژاردنەکان دەڵێت، بەپێی یاسای کۆمسیۆن دەبێت لەماوەی یەک مانگدا تەواوی پۆستەر و ڕیکلامەکانی بانگەشەی هەڵبژاردن لاببرێن، هەر کەسێکیش سەرپێچی بکات بە بڕی دوو ملیۆن دینار سزادەدرێت.
بەپێی ئاماری لقی کەرکوکی کۆمسیۆنی باڵای سەربەخۆی هەڵبژاردنەکان، ڕێژەی بەشداریكردنی هاوڵاتییانی پارێزگاكە لە پرۆسەی دەنگداندا 39.4% بووە و 130 پاڵێوراو لە سێ بازنەدا خۆیان كاندیدكردبوو بۆ بەدەستهێنانی 12 كورسیی ئەنجومەنی نوێنەرانی عێراق.
