خۆپیشاندان لە بەغداد بۆ ڕۆژی دووەم بەردەوامە و ژمارەی قوربانییەكانیش زیاتر بوون.
لە كۆنگرەیەكی ڕۆژنامەوانیی هاوبەشدا كە ئەمشەو 26ی تشرینی یەكەم لە بەغداد بەڕێوەچوو، فەرماندەیی ئۆپەراسیۆنە هاوبەشەكان و وتەبێژانی وەزارەتی ناوخۆ و فەرماندەی گشتیی هێزە چەكدارەكان و وەزارەتی تەندروستیی عێراق، ئاماری قوربانییانی توندوتیژیی نێو خۆپیشاندانەكانی دوو ڕۆژی بەغداد-یان خستەڕوو.
لە كۆنگرەكەدا، لیوا- سەعد مەعن، وتەبێژی وەزارەتی ناوخۆی عێراق ڕایگەیاند، “ژمارەیەكی زۆر نارنجۆكی دەستكردی خۆماڵی دەستیان بەسەردا گیراوە و 141 كەس بەتۆمەتی هاویشتنی نارنجۆك و پەلاماردانی هێزە ئەمنییەكان لە بەغدا دەستگیركراون.”
پاشان لیوا- تەحسین خەفاجی، وتەبێژی فەرماندەیی ئۆپەراسیۆنە هاوبەشەكان وتی، “زیاتر لە 1500 بۆمبی مۆلۆتۆف لەلایەن خۆپیشاندەران و ئەوانەی خزاونەتە ڕیزەكانیانەوە، نراون بە كارمەند و ئەفسەرانی هێزە ئەمنییەكانەوە، ئەوەش ژمارەیەكی زۆر لێبرینداركردوون كە دووانیان ئەفسەرن.”
بە وتەی خەفاجی، “لە ماوەی دوو ڕۆژی خۆپیشاندانەكاندا، چەندین كاری دزی و بڕینی فرۆشگا لە بەغداد ڕویانداوە.”
دواتر لە كۆنگرە ڕۆژنامەوانییەكەدا، لیوا- یەحیا ڕەسوڵ، وتەبێژی فەرماندەی گشتیی هێزە چەكدارەكانی عێراق قسەیكرد و وتی، “كارمەندانی هێزە ئەمنییەكان ئەركەكانیان ڕادەپەڕێنن و خۆپیشاندەران دەپارێزن، بەڵام هاویشتنی بۆمبی مۆڵۆتۆف بە ئاراستەی هێزەكاندا، بووەتە هۆی برینداربوونی دەیانیان.
لای خۆیەوە، سەیف بەدر، وتەبێژی وەزارەتی تەندروستیی عێراق ڕایگەیاند، “200 برینداری كارمەندانی هێزە ئەمنییەكان براونەتە نەخۆشخانەكان و زۆربەیان دوای وەرگرتنی چارەسەر نەخۆشخانەكانیان بەجێهێشتووە، بەڵام 25 كەسیان بەهۆی سەختیی برینەكانیانەوە، دۆخی تەندروستییان ناجێگیرە.”
وتەبێژی وەزارەتی تەندروستی، وتشی، “40 خۆپیشاندەر و هاوڵاتی بەهۆی توندوتیژییەكانەوە برینداربوون و براونەتە نەخۆشخانە، بەڵام هەموویان چارەسەریان وەرگرتووە و لە نەخۆشخانەكان دەرچوون.”
