عومەر سەید عەلی: دەنگدان درێژكراوەی خەباتی سەدەیەكی مرۆڤی كوردە

ڕێکخەری گشتیی بزوتنەوەی گۆڕان دەنگدان بە درێژکراوەی خەباتی سیاسیی زیاتر لە سەدەیەکی مرۆڤی کورد دژی ستەمی نەتەوەیی و داگیرکاری وەسف دەکات، داواش لە خەڵکی کوردستان و ناوچە جێناكۆكەكان دەکات بەشداریی پرۆسەی هەڵبژاردن بکەن و دەنگ بە هاوپەیمانی کوردستان بدەن.

عومەری سەید عەلی، ڕێكخەری گشتیی بزوتنەوەی گۆڕان لە پەیامێكی ڤیدیۆییدا ڕایگەیاند، “لە کۆتایی هەڵمەتی بانگەشەی هەڵبژاردنی پێشوەختی ئەنجومەنی نوێنەرانی عێراقین و لەبەردەم بەرپرسیارێتییەکی نەتەوەیی و نیشتمانی و دیموکراتین بۆ دیاریکردنی چارەنووسی گەلەکەمان بۆ چوار ساڵی داهاتووی عێراق”.

ڕێكخەری گشتیی بزوتنەوەی گۆڕان داوایكردووە “هەموو ئەوانەی مافی دەنگدانیان هەیە بێ دوو دڵی بەشداریی لەم هەڵبژاردنە بکەن و دەنگ بە هاوپەیمانی کوردستان و کاندیدەکانی بزوتنەوەی گۆڕان بدەن”.

‎عومەر سەید عەلی وتیشی، “ئەم هەڵبژاردنە ‎بۆ دەنگدەرانی هەرێمی کوردستان و کەرکوک و ناوچە جێناکۆکەکان هەم مافە، هەم ئەرکە بۆ پاراستنی دەستکەوتە نەتەوەییەکان، بۆ ڕووبەڕووبوونەوەی مەترسی و ئاڵنگارییەکان، بۆ پاراستنی پێگەی نەتەوەیەکی مافخوراو و قوربانیدەر”.

پەرلەمانی عێراقیش بەو شوێنە دەزانێت كە نوێنەرانی کورد دەتوانن داکۆکی لە ماف و دەستکەوتەکانی هەرێمی کوردستان بکەن، بۆیە دەڵێت، “دەنگی ئێوە نرخ و بەهایەکی گەورەی هەیە بۆ گۆڕانکاری لە نەخشەی سیاسیی عێراق و متمانەدان بە نوێنەری شایستە و کارامە بۆ داکۆکیکردن لە مافە دەستورییەکانمان”.

عومەر سەید عەلی ڕوو لە دەنگدەری كوردستانی دەڵێت، “دەنگدانی ئێوە درێژکراوەی خەباتی سیاسیی زیاتر لە سەدەیەکی مرۆڤی کوردە دژی ستەمی نەتەوەیی و داگیرکاری، دژ بە جینۆساید و کیمیاباران و شەهید و قوربانیدانی هەزاران کورد لە ڕێگای سەربەخۆیی و سەرفرازیی نەتەوەکەمان لە عێراق”.

دەقی پەیامەکەی عومەرسەید عەلی ڕێکخەری گشتیی بزوتنەوەی گۆڕان

هاوڵاتیانی هەرێمی کوردستان..

دانیشتوانی کەرکوک و ناوچە جێناکۆکەکان…

کوردستانیانی دڵ پڕ هیوا..

‎لە کۆتایی هەڵمەتی بانگەشەی هەڵبژاردنی پێشوەختی ئەنجومەنی نوێنەرانی عێراقین، لەبەردەم بەرپرسیارێتییەکی نەتەوەیی و نیشتمانی و دیموکراتین بۆ دیاریکردنی چارەنوسی گەلەکەمان بۆ چوار ساڵی داهاتوی عێراق، لەو سۆنگەیەوە، داوادەکەین هەموتان (ئەوانەی مافی دەنگدانتان هەیە) بێ دوو دڵی بەشداری لەم هەڵبژاردنە بکەن و دەنگ بە هاوپەیمانی کوردستان و کاندیدەکانی بزوتنەوەی گۆڕان بدەن.

‎وەک لای هەموان ئاشکرایە، هەڵبژاردنی پیشوەختی عێراق بەرهەمی فشاری خۆپیشاندەرانی ناوەڕاست و باشوری عێراقە، کە داوای مافە بنەڕەتیەکانیان دەکرد و لەو پێناوەشدا زیاتر لە (٦٠٠) خۆپیشاندەر گیانیان بەختکرد.

‎بۆ دەنگدەرانی هەرێمی کوردستان و کەرکوک و ناوچە جێناکۆکەکان، دەنگدان هەم مافە و هەم ئەرکە بۆ پاراستنی دەستکەوتە نەتەوەییەکان، بۆ روبەڕوبونەوەی مەترسی و ئاڵنگارییەکان، بۆ پاراستنی پێگەی نەتەوەییەکی مافخوراو و قوربانیدەر، بۆ گۆڕینی ئامرازی خەباتی نەتەوەیی لە شۆڕش و چەکەوە بۆ دەنگ و سندوقەکانی هەڵبژاردن، پەرلەمانی عێراق جێگایەکە کە نوێنەرانی کورد دەتوانن داکۆکی لە ماف و دەستکەوتەکانی هەرێمی کوردستان بکەن. کەواتە؛ دەنگی ئێوە نرخ و بەهایەکی گەورەی هەیە بۆ گۆڕانکاری لە نەخشەی سیاسی عێراق و متمانەدان بە نوێنەری شایستە و کارامە بۆ داکۆکیکردن لە مافە دەستورییەکانمان.

دەنگدانی ئێوە درێژکراوەی خەباتی سیاسیی زیاتر لە سەدەیەکی مرۆڤی کوردە دژی ستەمی نەتەوەیی و داگیرکاری، دژ بە جینۆساید و کیمیاباران و شەهید و قوربانیدانی هەزاران کورد لەرێگای سەربەخۆیی و سەرفرازی نەتەوەکەمان لەعێراق.

‎بزوتنەوەکەمان، وەک هێزێکی مەدەنی چاکسازیخواز، بەپێی ئەو ستراتیژەی کە هەمانە جەخت لەسەر ئاسایکردنەوەی پەیوەندییەکانی حکومەتی هەرێم و حکومەتی ئیتحادی بە ئامانجی دەستەبەرکردنی ژیانێکی شایستە بۆ هاوڵاتیان دەکەینەوە، جەخت لەسەر بەشدارییەکی راستەقینەی کورد لە دەزگای بڕیاردانی سیاسیی عێراق و جێبەجێکردنی دەستور دەکەینەوە بۆ چارەسەرکردنی کێشەی خاک و دەسەڵات و سامان جەخت لەسەر جێبەجێکردنی مادەی ١٤٠ و چارەسەرکردنی کێشەکانی پێشمەرگە و بودجە و دابینکردنی موچە بۆ فەرمانبەرانی ھەرێم دەکەینەوە، پێداگیری لەسەر دروستکردنی ئەنجومەنی ئتیحادی و کارکردن بە پرەنسیپەکانی سازان و هاوسەنگی بۆ حوکمڕانی و بەشداریکردن لەکایەی سیاسیی دەکەینەوە، لەو چوارچێوەیەدا، پرۆسەی دەنگدان و خەباتی پەرلەمانی وەک شاڕێگەی پاراستنی دەستکەوتەکانی کورد و، بڕیاردان لە چارەنوسی خەڵکی کوردستان لەرێی ئیرادەی خەڵک دەبینین.

‎بزوتنەوەی گۆڕان، لە چوارچێوەی هاوپەیمانی کوردستان بە دیدی نیشتیمانیەوە نوێنەرایەتی دەکات و دەمانەوێت پارێزەری بەرژەوەندی گشتی کوردستان و دەستکەوتە نەتەوەییەکان بین، لەو راستیەوە، یەکڕیزی لایەنە کوردستانیەکان و یەکخستنی گوتاری کوردستانی لە چوارچێوەی دەوڵەتی عێراقی ئیتحادی، کە گوزارشت لە بەدەستهێنانی ئامانجە باڵا نیشتمانییەکان بکات بە پێویست دەزانین. لە ناوخۆی هەرێمی کوردستانیش داوای دەستورێکی دیموکراتی و مەدەنی دەکەین کە رەنگدانەوەی ماف و داخوازییەکانی کۆمەڵگای کوردستان و پێکھاتەکانی بێت. ھاوکاتیش دەستکردن بە پەیرەوکرنی بەرنامەیەکی نیشتمانی بۆ چاکسازی سیاسیی یاسایی و کارگێڕی و دارایی، بۆ قەڵاچۆکردنی گەندەڵی و باشکردنی بژێوییەکانی ژیانی خەڵک و کەمکردنەوەی مەینەتییەکانی هاوڵاتیانی هەرێمی کوردستان بە پێویستیەکی لەپێشینە دەزانین. هەر لەسەر ئەو بنەمایانەش بزوتنەوەی گۆڕان بۆ ئەم هەڵبژاردنەی عێراق لەگەڵ یەکێتی نیشتمانی کوردستان هاوپەیمانی پێکهێناوە.

دەنگدەران و هاوڵاتیانی هەرێم و کوردانی کەرکوک و ناوچە جێناکۆکەکان..

ژنان و گەنجان و هەمو چین و توێژەکانی کۆمەڵگای کوردستان..

‎ئێوەی خۆشەویست دەزانن بزوتنەوەکەتان لەماوەی رابردو و لەمیانی بەشداریکردنی لە پرۆسەی سیاسی چ لە هەرێمی کوردستان و چ لە سەرئاستی عێراق؛ بە کاری نایاسایی و سەفەقاتی ژێربەژێر تێوەنەگلاوە، هەر بۆیە هەڵسوڕاو و گۆڕانخوازان بەدەنگێکی زوڵاڵ و دلێرەوە بانگەشەی هەڵبژاردن دەکەن و داوا لە خەڵک دەکەن دەنگ بە کاندیدەکانی بزوتنەوەی گۆڕان بدەن، ئێمەش لەو چوارچێوەیەدا داوا دەکەین لە دەنگدەران و خەڵکی بە ئەمەکی کوردستان لە هەرشوێنێکی عێراقن؛ بەشداری پرۆسەی هەڵبژاردن بکەن و دەنگتان بۆ هاوپەیمانی کوردستان و کاندیدەکانی بێت. دەنگتان بۆ کاندیدەکانی بزوتنەوەی گۆڕان بێت کە شایستە و خاوەن پسپۆرین و، خەڵکی سنورەکەی خۆتان و لەناو خەم و کێشەکانی جەماوەر گەورە بوون.

هەڵسوڕاو و گۆرانخوازانی بە هەڵوێست..

‎بزوتنەوەی گۆڕان لەم هەڵبژاردنە چارەنوسسازەدا؛ پێویستی بە هیمەت و کۆششی زیاتری ئێوەیە بۆ هاندانی هاوڵاتیان بەمەبەستی بەشداریکردن لە هەڵبژاردن و دەنگدان بە کاندیدەکانمان، ئەم رۆڵە گرنگەی ئێوە دەبێتە بەردی بناغەی بەهێزکردنی پڕۆژەی سیاسیی رەوانشاد نەوشیروان مستەفا و پاراستنی بزوتنەوەی گۆڕان؛ کە بوونی سەنگەرێکی پتەوە بۆ خەباتی مەدەنی و پەرلەمانی و بەهێزبوونەوەی پێگەو سەنگی خەڵک لە هاوکێشەی سیاسیی هەرێم و عێراق.

‎پێویستە ئەوەش بڵێین، بزوتنەوەی گۆران پڕۆژەیەکی نیشتیمانیە و هی هەمو ئەو خەڵکە دڵسۆزەیە رۆژێک لە رۆژان پشتیوانی کردووین، پڕۆژەیەکە لە پێناو سەرخستنی پرۆسەی چاکسازی سیاسیی و گەیشتن بە ئامانج و بەرژەوەندییە باڵاکانی گەلەکەمان لە خەباتدایە، هەربۆیە پێویستمان بە هەمووتانە و گۆڕانیش هی هەموانە..

‎لە کۆتایدا، پشت بە ئیرادەی بەهێزی میللەتەکەمان و گۆڕانخوازان سەردەکەوین…

27 جار خوێندراوەتەوە

زۆرترین خوێندراو

24 کاتژمێرهەفتەمانگ

01

وێنە؛ لە بنکەیەکی هەولێر دەنگدان ڕاگیرا

8/10/2021

02

لە عێراق دوو رۆژ و لە هەرێمی کوردستانیش یەک رۆژ کرایە پشوو

7/10/2021

03

رێکخراوی تەندروستی جیهانی پلانی ڤاکسینکردن ئاشکرا دەکات

8/10/2021

04

دواین زانیاری لەبارەی داخستنی فڕۆکەخانە و دەروازە سنورییەکان

7/10/2021

05

دیجیتاڵ میدیای (KNN) کێشەی بنکەکانی دەنگدان ئاشکرا دەکات

8/10/2021

بابەتی پێشتر

دەنگدانی تایبەت لە هەرێم.. تا ئێستا ڕێژەی بەشداری لە هەولێر كەمترین و لە دهۆك و سلێمانی زۆرترینە

بابەتی دواتر

کۆمسیۆن: ئەنجامەکانی دەنگدانی تایبەت لەگەڵ دەنگدانی گشتی ڕادەگەیەنرێت

بابەتی پەیوەندیدار
زیاتر ببینە

تۆمەتبارێكی دزینی ئۆتۆمبێل دەستگیركرا

به ‌تۆمه‌تی‌ دزینی‌ ئۆتۆمبێل، كەسێك لەلایەن مه‌فره‌زه‌كانی‌ بنكه‌ی‌ پۆلیسی‌ زه‌ڕایه‌نەوە دەستگیركرا. بەپێی راگەیەندراوی بەڕێوەبەرایەتیی پۆلیسی پارێزگای سلێمانی، تۆمه‌تبارەكە…
Total
0
Share