سەرۆکی چاودێرانی نێردەی یەکێتیی ئەوروپا ڕایگەیاند، چاودێریی دەنگدانی تایبەت و گشتی دەکەن و بۆ پڕۆسەکە 90 چاودێر بڵاوەپێدەکەن، لەگەڵ ئەوەش 50 دیپلۆماتی کەنەدی و نەرویجی و چەند وڵاتێکی دیکە چاودێریی هەڵبژاردنەکان دەکەن.
ڤیولا ڤۆن کرامۆن، سەرپەرشتیاری چاودێرانی یەکێتیی ئەوروپا، بە تۆڕی میدیایی ئێستای ڕاگەیاند، “سبەی ئێمە چاودێریی دەنگدانی تایبەت دەکەین و لە 10ـی ئۆکتۆبەر چاودێریی دەنگدانی گشتی دەکەین، هەروەها یەکێتی ئەوروپا بۆ چاودێریی هەڵبژاردن نزیکەی 90 چاودێر بڵاوەپێدەکات لە ڕۆژی هەڵبژاردندا، کە شاندێکی حەوت ئەندامی لە پەرلەمانی ئەوروپاوە و نزیکەی 50 دیپلۆمات لە وڵاتانی ئەندامی یەکێتیی ئەوروپا، کەنەدا و نەرویج لەخۆدەگرێت، کە وەک بەشێک لە نێردەی یەکێتیی ئەوروپا بۆ چاودێریی هەڵبژاردن چاودێری دەکەن”.
کرامۆن ئاشكراشیکرد، “دوای دوو ڕۆژ لە هەڵبژاردن و لە 12ـی ئۆکتۆبەردا، لە کۆنگرەیەکی ڕۆژنامەوانیدا لە بەغداد، دەرئەنجام و دۆزینەوە سەرەتاییەکانی نێردەکە پێشکەش دەکات، لە کاتێکدا چاودێرانی نێردەکە بەردەوام دەبن لە چاودێریکردنی پێشهات و پەرەسەندنەکانی دوای هەڵبژاردن لە سەرانسەری عێراق”.
نزیکەی دوو مانگ دوای هەڵبژاردنەکان، سەرۆکی چاودێرانی یەكێتیی ئەوروپا ڕاپۆرتی کۆتایی نێردەی یەکێتی ئەوروپا بۆ چاودێریی هەڵبژاردن پێشکەش دەکات، هەروەها ڕاپۆرتەکە ڕاسپاردە و پێشنیاز لەخۆدەگرێت بۆ باشترکردنی هەڵبژاردنەکانی داهاتوو.
بەوتەی سەرۆکی چاودێرانی یەکێتیی ئەوروپا، چەند ڕۆژێک پێش ئێستا لەگەڵ لایەنەکان کۆبوونەوەیان کردووە و هاوکات بەرپرسانی کۆمسیۆنی باڵای سەربەخۆی هەڵبژاردنەکانیان بینووە، بەمەبەستی چاودێریکردنی باشتری پرۆسەکە.
