باهۆزی شاهین پارێزگای سیستان و بلوجستان-ی لە باشووری ڕۆژهەڵاتی ئێران گرتەوە و بەهۆیەوە دەیان كەس برینداربوون و سێ ڕێگای سەرەكیش داخران.
بەپێی دەسەڵاتدارانی ئێران، باهۆزەكە گەیشتووەتە شاری چابەهار لە باشووری پارێزگای سیستان و بلوجستان پاش بارانێكی بەهێز لە بەرەبەیانی دوێنێ شەممە و بووەتە هۆی تێكشان و نقومبوونی سەكۆیەكی تایبەت بە ڕاوكردن لە بەندەری بساندەر دەشتیاری كە دەكەوێتە دووری 100 كیلۆمەتر لە بەندەری چابەهار.
جەلالەدین قادری، بەڕێوەبەری گشتیی كاروباری باركردن و گواستنەوەی ڕێگاوبان لە باشووری پارێزگای سیستان و بلوجستان ڕایگەیاند، ڕێگای ڕیمدانی سنووری و ڕێگابڕی نگۆر-پرێس و ڕێگای سماج-سندها بەهۆیەوە تا كاتێكی نادیار داخراون.
لای خۆیەوە موجتەبا خالدی، وتەبێژ بەناوی ڕێكخراوی بەهاناوەچوونی ئێرانی ڕایگەیاند، 52 كەس سەردانی ناوەندە تەندروستییەكانی ئەو ناوچانەیان كردووە كە باهۆزەكە گرتوونیەتەوە و سێیان لە ناوەندەكان هێڵدراونەتەوە.
ئاماژەی بەوەشكرد، زۆرینەی ئەو گرفتە تەندروستییانەی بەهۆی باهۆزەكەوە دروستبووە پەیوەندیداربووە بە چاو، نەخۆشییەكانی هەناسەدان و دڵ.
ئێوارەی دوێنێش ئاژانسی فارس تۆماركردنی 13 برینداری دیكەی بەهۆی باهۆزەكەی بەندەری چابەهار ڕاگەیاند، ئەوەشی ئاشكراكرد هەڵگەڕانەوەی بەلەمێكی ڕاوچییانی ماسی بووەتە هۆی بێسەروشوێنبوونی پێنج كەسیان.
