بەگوێرەی گۆڤاری فۆربس، سەروەتی بێرنارد ئارنۆ، بەڕێوبەری گشتیی كۆمپانیای “LVMH” تایبەت بە كاڵای جوانكاریی گرانبەها، لەماوەی یەك هەفتەدا 8 ملیار دۆلار زیادی كردووە.
فۆربس كە گۆڤارێكی ئەمریكییە و چاودێریی داهات و سەرمایەی بزنسمان و بزنسومانە ملیاردێرەكانی ئەمریكا و جیهان دەكات، ئەمڕۆ یەكشەممە 25ی تشرینی یەكەم بڵاویكردووەتەوە، هەرچەندە بەهۆی كۆرۆناوە ئابوریی جیهان زیانی گەورەی پێگەیشتووە، بەڵام گروپی كۆمپانیاكانی “LVMH” ڕایانگەیاندووە، ئاماژەكان بەرەو ئەوە دەچن كە بزنسەكەیان گەشەكردنی بەخۆیەوە بینیووە.
ئەوەش ئاشكراكراوە، لەماوەكانی نێوان 15 بۆ 22ی تشرینی یەكەم پشكەكانی كۆمپانیاكە بەڕێژەی 6% بەرزبوونەوەی بەخۆیەوە بینیووە، ئەوەش سەری كێشاوە بۆ ئەوەی سەروەتی بێرنارد ئاڕنۆ، بەڕێوبەری گشتیی كۆمپانیاكە لەماوەی یەك هەفتەدا 8 ملیار دۆلار زیاد بكات و بگاتە 122 ملیار دۆلار.
بەڵام فۆربس دەڵێت، ئەو گۆڕانكارییانە واتای ئەوە نییە بارودۆخی كۆمپانیاكە باش بووە، چونكە لەماوەی نۆ مانگی سەرەتای ئەمساڵ قازانجی كۆمپانیاكە بەڕێژەی 21% دابەزیووە.
