ئێوارەی هەینی، بە ئامادەبوونی هاوڵاتییان و کونسوڵی چیک لە هەرێم و پارێزگاری سلێمانی، کۆنسێرتی هاوبەشی میوزیكی کوردی – چیکی بەڕێوەچوو.
کۆنسێرتەکە لە شانۆی ڕۆمانی لە پارکی هەوارشار لە سلێمانی بەڕێوەچوو و هەردوو گروپی میوزیکی کوردی و چیکی، بەجیا، بەرهەمەکانی خۆیان پێشکەشی ئامادەبووان کرد.
سەرەتای کۆنسێرتەکە لەلایەن تیپی سوهرەوەردی و بە ژەنینی ئامێرەكانی دەف و نەی دەستیپێکرد، دواتر تیپی هونەری بەردەلۆنیۆی چیکی ئێوارەکۆنسێرتەکەیان بەچەندین پارچە میوزیک و گۆرانیی بیانی بەردەوامی پێدا، هەروەها میوزیکی مارشی “ئەی ڕەقیب”یان ژەند.
ئەو ئێوارە کۆنسێرتە هاوبەشەی میوزیک و گۆرانی، بەبۆنەی 15ساڵ تێپەڕبوون بوو بەسەر کردنەوەی ئۆفیسی نوێنەرایەتیی کۆماری چیک لە هەرێمی کوردستان.
