نوێنەری حكومەتی هەرێمی كوردستان لە بەغداد، هۆكاری دواكەوتنی ڕەوانەكردنی 200 ملیار دینارەكەی بەغداد بۆ هەرێم ئاشكرادەكات.
فارس عیسا، نوێنەری حكومەتی هەرێمی كوردستان لە بەغداد لە لێدوانێكی تایبەتدا بۆ تۆڕی میدیایی ئێستا ڕایگەیاند، هۆكاری دواكەوتنی ڕەوانەكردنی 200 ملیار دینارەكەی بەغداد، پشوو و هەروەها ڕێوڕەسمی چلەی ماتەمینیی ئیمام حوسێنە.
وتیشی، دوای دەستپێكردنەوەی دەوام و كۆتاییهاتنی ئەو پشووە، بەغداد پارەكە ڕەوانەی هەرێم دەكات.
نوێنەری حكومەتی هەرێم لە بەغداد ڕوونیشیكردەوە، دەبووایە ئەم هەفتەیە بەغداد پارەكەی ڕەوانەبكردایە، بەڵام بەو هۆكارە دواكەوتووە.
بەهۆی دواكەوتنی ڕەوانەكردنی پارەكەی بەغداد، وەزارەتی دارایی هەرێم مووچەی مانگی ئەیلولی تەنها چەند وەزارەتێكی دابەشكردووە، لەكاتێكدا پێشتر لەماوەی چەند ڕۆژێكدا مووچەی تەواوی وەزارەت و دەستەكان دابەشدەكران.
