سەرچاوە ئەمنییەکانی عێراق ڕایانگەیاند، بەهۆی هێرشێکی داعشەوە لە باکووری ڕۆژهەڵاتی بەعقوبەی سەربە پارێزگای دیالە، حەوت کەس کوژران و برینداربوون، کە یەکێکیان ئەفسەرێکی هێزە ئەمنییەکانە.
ئاژانسی هەواڵی فەرمیی عێراقی لەزاری سەرچاوەیەکی ئەمنییەوە بڵاویکردەوە، بۆمبێکی چێنراو بە ئۆتۆمبێلێکی بەرهەڵگردا تەقیوەتەوە، دوای کۆبوونەوەی خەڵک و پۆلیس، چەکدارانی داعش بە چەکی قەناس هێرشیان کردووەتە سەریان.
سەرچاوە ئەمنییەکە ئاماژەی بەوەکردووە، هێرشەکە بووەتەهۆی گیانلەدەستدانی سێ هاوڵاتیی سڤیل و ئەفسەرێکی پۆلیس بە پلەی عەقید، هەروەها برینداربوونی ژمارەیەکی دیکە، کە هاوڵاتی و پۆلیسی عێراقییان تێدایە.
