حكومەتی عێراق كۆبوونەوەی هەندێك لە سەرۆك هۆزە عەرەبەكان لە هەولێر بە نایاسایی ناودەبات، كە تیایدا داوای ئاساییكردنەوەی پەیوەندییەكان لەگەڵ ئیسرائیل كرابوو و داواكاریییەكەشیان ڕەتدەكاتەوە.
نووسینگەی ڕاگەیاندنی سەرۆك وەزیرانی عێراق ڕاگەیەندراوێكی بڵاوكردەوە و تیایدا هاتووە، حكومەت دووپاتیدەكاتەوە ئەم كۆبوونەوانە دەربڕی ڕای خەڵك و دانیشتووانی شارەكانی عێراق نییە، كە ئەو كەسایەتییانە دەیانەوێت بەناوی دانیشتووانەكانیانەوە بدوێن، بەڵكو تەنها هەڵوێستی ئەوانەیە بەشداربوون تیایدا.
كۆبوونەوەكەش بە هەوڵێك بۆ “شێواندنی دۆخی گشتی و زیندووكردنەوەی تایفیەت” ناودەبات، لەكاتێكدا شارەكانی عێراق لە ئامادەكاریدان بۆ ئەنجامدانی هەڵبژاردنی پێشوەختە.
نووسینگەكەی كازمی جەختیشدەكاتەوە كە خستنەڕووی دەستەواژەی ئاساییكردنەوە لەڕووی دەستووری و یاسایی و سیاسی لە وڵاتی عێراقدا ڕەتكراوەیە و “حكومەت بە ڕوونی هەڵوێستی مێژوویی چەسپاوی عێراقی لە پشتیوانیكردنی پرسی دادپەروەرانەی فەڵەستین و بەرگریكرن لە مافەكانی گەلی فەڵەستین دووپاتكردوەتەوە، كە لە پێشینەیدا مافی بوونی دەوڵەتی سەربەخۆیە، كە پایتەختەكەی قودس بێت”.
“لەگەڵ ڕەتكردنەوەی سەرجەم جۆرەكانی نیشتەجێكردنی جووەكان و دەستدرێژی و داگیركاری كە ئیسرائیل دژ بە گەلی فەڵەستینی ئەنجامیدەدات”، وەك ئەوەی لە بەشێكی دیكەی ڕاگەیەندراوەكەدا هاتووە.
ڕۆژی هەینی نزیكەی 300 كەسایەتیی سوننی و شیعی لە كۆبوونەوەیەكدا لە هەولێر داوایان لە حكومەتی بەغداد كرد پەیوەندی دیپلۆماسی لەگەڵ ئیسرائیل گرێبدات، وەك ئەوەی ڕۆژنامەی (یەدیعۆت ئەحرۆنۆت)ی ئیسرائیلی بڵاویكردووەتەوە.
لە 15ی ئەیلولی 2020 ئیمارات و بەحرەین یەكەم دوو دەوڵەتی كەنداو بوون كە ئاساییكردنەوەی پەیوەندییەكانیان لەگەڵ ئیسرائیل ڕاگەیاند، دواتریش هەریەك لە مەغریب و سودان هەمان هەنگاویان گرتەبەر.
لە ساڵی 1948 پاش جەنگێك لەگەڵ وڵاتانی عەرەبی و لەنێویشیاندا عێراق، دەوڵەتی ئیسرائیل ڕاگەیەندرا، بەهۆیەوە زۆرینەی ئەو جووانەی لە عێراق نیشتەجێبوون و ژمارەیان 150 هەزار كەس بوو، وڵاتیان بەرەو ئیسرائیل جێهێشت.
