شەوی ڕابردوو چەند کەسێکی نەناسراو بە نارنجۆک هێرشیانکردەسەر ماڵی چالاکوانێکی ژنی خەڵکی شاری سەردەشت و زیانی ماددیی زۆریان بە ماڵەکە گەیاندووە.
ئەو چالاکوانە ناوی “ناسکە ئەفخەمی”یە و پێشتر ناوی چەند کەسێکی بڵاوکردبووەوە کە بەرپرسن لە دەستدرێژیی سێکسی بۆسەر کچان و ژنانی سەردەشت.
هەفتەی ڕابردوو “ناسکە ئەفخەمی” و چەند چالاکوانێکی دیکە ناوی چەند کەس و باندێکیان ئاشکراکرد، کە بەرپرسبوون لە دەستدرێژیی سێکسی بۆسەر ژنان و کچان.
بەپێی زانیارییەکان، هێرشەکە بۆسەر ماڵی باوکی ناسکە ئەفخەمی بووە و ئەو چەند کەسە هێرشی توندیان کردووەتەسەر دایک و باوکی ناسکە، کە هەردووكیان بەساڵاچوون.
ڕێکخراوەکانی مافی مرۆڤ لە ڕۆژهەڵاتی کوردستان ئاشکرایانکردووە، “ئەمڕۆ کەسێکی نەناسراو پەیوەندی بە خوشکی ناسکەوە کردووە و هەڕەشەی ئەوەیکردووە، ئەگەر ناسکە لە بڵاوکردنەوەی ئەو ناوانە پەشیمان نەبێتەوە، ئەوا دەکوژرێت”.
ناسکە ئەفخەمی چالاکوانێکی ڕۆژهەڵاتی کوردستانە و خاوەنی مافی مانەوەیە لە سوید، بەڵام لەچەند ڕۆژی ڕابردوودا ناوی چەند کەس و باندێکی ئاشکراکردبوو كە بەرپرسن لە دەستدرێژیی سێکسی بۆسەر ژنان و کچان، کە بەهۆی ئەوەوە چەندین کچ و ژن هەوڵی خۆکوشتنیان داوە.
