لە شاری لیۆن-ی فەرەنسا شوێنێكی گشتی كرا بە ناوی “هەڤرین خەڵەف”ــەوە.
سۆنیا زدۆرۆڤتزۆف، كە ڕاوێژكارێكی پەیوەندییە نێودەوڵەتییەكانە لە فەرەنسا، تویتێكی بڵاوكردووەتەوە، وێنەی مەراسیمێكی بڵاوكردووەتەوە، تیایدا شوێنێكی گشتی لە شاری لیۆن-ی فەرەنسا كراوە بە ناوی هەڤرین خەڵەف، ژنە سیاسەتوانی كورد لە ڕۆژئاوای كوردستان.
سۆنیا لە تویتەكەیدا هەڤرین-ی بە “ژنێكی خاوەن چاكەی گەورە، نمونەیی، سوری، كوردی، ئەندازیار، فێمێنیزم و سیاسەتوان، لە تەواوی ژیانە كورتەكەیدا كاری لەپێناو دیموكراسی، فرەیی و لامەركەزییەت كردووە لە سوریا” وەسفكردووە.
هەڤرین خەڵەف ژنە سیاسەتوانی کوردی ڕۆژئاوای کوردستان، سکرتێری پارتی سوریای داهاتوو بوو، ڕۆژی 2019/10/12، لەسەر ڕێگای سەرەکیی نێوان قامیشلۆ و ڕەققە لەلایەن چەکدارانی گروپە ئۆپۆزسیۆنەکانی سوریاوە شەهیدکرا.
شەهیدكردنەكە دەنگدانەوەیەكی زۆری لە كوردستان و جیهان بەدوای خۆیدا هێنا.
