لەماوەی تەنها هەفتەیەکدا پێنج کۆڵبەری کورد، لەلایەن هێزە ئەمنییەکانی تورکیا و ئێرانەوە کوژراون و چەند کەسێکی دیکە برینداربوون.
لە نوێترین ڕووداودا بەهۆی تەقەی هێزە ئەمنییەکانی تورکیا لەسەر سنووری نێوان ڕۆژهەڵات و باکووری کوردستان، دوو کۆڵبەری گوندێکی شاری ورمێ کوژراون و سێ کۆڵبەری دیکە بریندار بوون.
لەماوەی هەفتەیەکدا لە سێ ڕووداوی جیاوازدا لە سنوورەکانی سەردەشت و بانە سێ کۆڵبەری کورد لەلایەن ئەندامانی سوپای پاسدارانەوە کوژراون.
دوێنێ دووشەممە لە کوێستانەکانی سنووری پارێزگای وان لە باکووری کوردستان، هێزە چەکدارەکانی تورکیا کاروانێکی کۆڵبەرانیان کردووەتە ئامانج و لانیکەم دوو کۆڵبەر کوژراون و سێ کۆڵبەری دیکە بریندار بوون.
ناسنامەی ئەو دوو کۆڵبەرە کە کوژراون “ئالیشان حەیدەری” تەمەن 18 ساڵ و “سۆزدار ئەحمەدی” تەمەن 21 ساڵن.
بەپێی زانیارییەکان و ئەو وێنانەی دوای ڕووداوەکە بڵاوکراوەتەوە دەرکەوتووە، کە سۆزدار ئەحمەدی مانگێک پێش ئێستا ژیانی هاوسەرگیریی پێکهێنابوو.
ئەو کۆڵبەرانە خەڵکی گوندی “کوران”ی سەر بە ناوچەی سۆما و برادۆستی ورمێ بوون و تا ئێستا ناسنامەی کۆڵبەرەکانی دیکە ئاشکرا نەبووە.
