ئەمڕۆ 78 ساڵ بەسەر لەدایکبوونی خانمی دیاری کوردستان، هێرۆ ئیبراهیم ئەحمەد تێدەپەڕێت.
هێرۆ ئیبراهیم ئەحمەد کە لەناو یەکێتییەکان و خەڵکدا بە ‘هێرۆ خان’ ناسراوە، لە ڕۆژی 12ـی حوزەیرانی 1948 لە بنەماڵەیەکی شۆڕشگێڕ و کوردپەروەر لەدایکبووە. لە ئامێزی هەریەکە لە ئیبراهم ئەحمەد، سیاسەتمەدار و ڕووناکبیر و خاتوو گەلاوێژ ساڵح، نووسەر و ڕۆماننووس پەروەردە بووە و هەر لە تەمەنێکی منداڵییەوە ئاشنای کتێب و خوێندنەوە بووە.
هێرۆخان خاوەنی 5 خوشک و 2 برایە بە ناوەکانی شاناز، هەتاو، کوردە، هێڤی، لیلۆز، هەڵۆ و هاوڕێ.
بەهۆی دۆخی سیاسیی کوردستان و ژیانی سیاسیی باوکییەوە، ماڵی هێرۆخان بەشێوەیەکی هەمیشەیی لە شوێنێکدا جێگیر نەبووە، هەر بۆیە قۆناغەکانی خوێندنی سەرەتایی لە کەرکوک و بەغداد تەواوکردووە، پاشان گەڕاوەتە بۆ سلێمانی و خوێندنی دواناوەندی تەواوکردووە، دوو ساڵیش لە تاران خوێندوویەتی. پاشان بەکالۆریۆسی لە بەشی دەروونناسی کۆلێژی پەروەردەی لە زانکۆی موستەنسیرییە لە بەغداد بەدەستهێناوە.
هێرۆ خان جیا لەوەی پێشمەرگەیەکی ئازا و چاونەترسی کوردستان بووە و هاوشانی سەرۆک مام جەلال لە شۆڕشی نوێی کوردستان ڕۆڵێکی بەرچاوی گێڕاوە، هاوکات بە کامێرایەکی VHS مێژووی ئەوکاتی گەلی کورد، بەگژداچوونەوەی زوڵم و ستەمی دەرهەق بە کورد، قارەمانێتی و نەبەردییەکانی پێشمەرگەی تۆمارکردووە و نیشانی جیهانی داوە. لەم بوارەشدا خاوەنی گەورەترین تۆمار و ئەرشیفی شۆڕشی نوێی کوردستانە.
هێرۆ خان لە ساڵانی 2005 بۆ 2013 خانمی یەکەمی عێراق بووە، خۆی حەزی بە پاشناوی ‘خان’ نەبووە و ڕەتیکردووەتەوە، حەزیکردووە بە ‘دادە’ بانگ بکرێت وەک ئاماژەیەک بۆ خوشكی گەورە.
لە ساڵی 1970 شوی بە سەرۆک مام جەلال کردووە، پاش سێ ساڵ نۆبەرەیەکیان دێتە ژیانەوە و ناوی لێدەنێن ‘بافڵ’، پاشان لە ساڵی 1977 منداڵێکی دیکەیان دەبێت و ناوی لێدەنێن قوباد. هێرۆ خان هاوشانی سەرۆک مام جەلال هاوخەبات و هاوسەنگەر بووە و هەر لەگەڵ ئەویش چـ.ـەکی پێشمەرگایەتی لەشان کردووە و ڕێگەی سەختی تێکۆشانی هەڵبژاردووە.
هێرۆ خان خولیایەکی زۆری میدیایی هەبووە، پاش ڕاپەڕینی مەزنی گەلی کورد لە ساڵی 1991، بەردەوامیی بەو خولیایە داوە و هەردوو تەلەڤیزیۆنی خاک و کەناڵی کوردساتی دامەزراندووە، کە هەردوو کەناڵ ئێستاش بەردەوامن لە کارکردن و خزمەتێکی فراوانی بواری ڕۆژنامەگەری، کەلتوور، پەروەردە و فەرهەنگی کوردییان کردووە.
هاوکات ڕێكخراوی منداڵپارێزی کوردستانی دروستکردووە کە خزمەتێکی زۆری بە منداڵان کردووە و تاوەکو ئێستاش بەردوامە لە کارکردن.
هێرۆ خان گرنگییەکی زۆری بە لاوان و گەنجان داوە. سەنتەری گەنجانی دامەزراندووە و پاڵپشتیی چالاکیی لاوانی کردووە.
هاوکات بە گرنگییەوە لە پاراستنی شوێنە کەلتووریی و مێژووییەکانی ڕوانیوە، پاڵپشتیی پڕۆژە کەلتوورییەکانی وەک، پاراستن و چاپکردنی دەستنووسی کۆن، گەلەریی زاموا، مۆزەخانەی ئەمنە سوورەکە، پاراستنی سەرا و پڕۆژەی پەیکەرسازی و چەندانی دیکە کردووە.
