گەڕانەوەی سێرجیۆ ئەگوێرۆ و عوسمان دێمبیلی بۆ نێو یاریگاکان کاتی زیاتری پێویستە، ڕۆناڵد کومانی ڕاهێنەری بارسا ناچارە سوود لە تواناکانی لوک دی یۆنگ وەربگرێت.
ڕۆژنامەی سپۆرت ئاشکرایکردووە، هەریەک لە عوسمان دێمبیلی و کون ئەگوێرۆ بەردەوامن لە قۆناغی چارەسەربوون لە پێکان، فەرەنسییەکە مانگی تشرینی دووەم دەگەڕێتەوە و ئەگوێرۆ پێویستی بە مانگێکی دیکە دەبێت بۆ گەڕاندنەوەی توانا جەستەییەکانی.
سەرچاوەکە جەختدەکاتەوە، پەرجوو (موعجیزە) ڕوونادات، دوو یاریزانەکە قۆناغەکانی چاسەر لەسەرخۆ تێدەپەڕێنن و ڕوونادات پێشوەخت بگەڕێنەوە، تەنانەت ئەگەر ئەوەش ڕووبدات، کومان لەو ڕاهێنەرانە نییە ڕیسک بە تەندروستییانەوە بکات.
لەلایەکی دیکەوە، هێرشبەری هۆڵەندی نوێی بارسا، لوک دی یۆنگ پشکنینە پزیشکییەکانی تێپەڕاند و لە یەکەم پەیامدا ڕایگەیاند، ” من ئامادەم، کومان پێشتر لە پێکهاتەی هۆڵەندا کاری لەگەڵمدا کردووە و دەزانێت چیم پێدەکرێت، دەمەوێت ڕاستەوخۆ لە بارسا دەستپێبکەم”.
سپۆرت نوسیویەتی، کومان تاوەکو پشووەکانی سەریساڵ و زستان دەرفەت بە دێمبیلی و ئەگوێرۆ دەدات، لەو ماوەیەشدا سوود لە دی یۆنگ و برەیزوایت وەردەگرێت.
