یەکێتی و یەکگرتوو جەخت لە هەماهەنگی و لێکتێگەیشتن دەکەنەوە

ئەمڕۆ بافڵ تاڵەبانی، ھاوسەرۆکی یەکێتیی نیشتمانیی کوردستان سەردانی سەلاحەدین محەمەد بەھائەدین، ئەمینداری گشتیی یەکگرتووی ئیسلامیی کوردستانی کرد و پرسی هەڵبژاردن و لێکتێگەیشتنی هەردوو حزب گفتوگۆی لەبارەوە کرا.

لەدیدارێکدا کە رەفعەت عەبدوڵا، بڕیاردەری دەستەی کارگێڕی و ئاسۆ مامەند و رزگار حاجی حەمە، ئەندامانی مەکتەبی سیاسی و ئەژی ئەمین، لێپرسراوی ئاژانسی پاراستن و زانیاری — زانیاری ھەرێمی کوردستان و سالار لالە سەرحەد، ئەندامی سەرکردایەتی ئامادەیبوون، گفتوگۆی ھەمەلایەنە لەبارەی پێشھات و پەرەسەندنە سیاسی، ئابووری و ئەمنییەکانەوە کرا و جەخت لەھەماھەنگی و دیدی ھاوبەش کرایەوە بۆ زاڵبوون بەسەر کێشەکان و چارەسەرکردنی گرفتەکان.

لەبارەی یەکخستنی ھەوڵەکان و کۆدەنگی و یەکڕیزی نیشتمانییەوە، ھەردوولا ھاوڕابوون لەسەر پەنابردن بۆ میکانیزمەکانی لێکتێگەیشتن و دیالۆگی بونیادنەرانە لەسەر بنەمای بەرژەوەندی باڵا و پاراستنی مافەکانی کورد لەچوارچێوەی یاسا و دەستووری عێراقی فیدڕاڵ.

ھەرلەدیدارەکەدا بیروڕا ئاڵوگۆڕکرا لەبارەی ھەڵبژاردنی ئەنجوومەنی نوێنەرانی عێراق، ھەماھەنگی و لێکتێگەیشتنی ھێزەکوردییەکان بە پێویستی ئەم قۆناغە زانرا بۆ دەستەبەرکردنی زۆرترین دەنگی کورد بە تایبەت لەناوچە کێشەلەسەرەکان و دروستکردنی کۆدەنگی نیشتمانی لەسەر پرسە نیشتمانیی و نەتەوەییەکان.

پتەوکردنی پەیوەندییەکانی یەکێتی و یەکگرتووی ئیسلامی کوردستان تەوەرێکی تری گفتوگۆکان بوو و جەخت لە فراوانکردنی پەیوەندییەکانی نێوان هەردوولا کرایەوە لەپێناو زیاتر خزمەتکردنی خەڵک و دابینکردنی ژیانێکی شایستە بۆ خەڵکی خۆشەویستی کوردستان.

بابەتی پێشتر

ئەگەر مۆبایلەكەت لەمجۆرانەیە چیتر ناتوانیت وەتساپ بەكاربهێنیت

بابەتی دواتر

چەمچەماڵ.. لە ڕووداوێكی هاتوچۆدا چواركەس گیانیان لەدەستدا

بابەتی پەیوەندیدار
Total
1
Share