بافڵ تاڵەبانی هاوسەرۆکی یەکێتیی نیشتمانیی کوردستان، پەیامێکی بەبۆنەی یادی دامەزراندنی کەناڵی ئاسمانیی کەرکوکەوە ئاراستەی بەڕێوەبەر، ڕۆژنامەنووسان و کارمەندانی کەناڵەکە کرد و ڕایگەیاند، “بە پەیامی پیشەیی و بەرپرسیارانە درێژە بەخزمەتەکانتان بدەن”.
لە پەیامەکەیدا بافڵ تاڵەبانی پیرۆزبایی یادی دامەزراندنی کەناڵی ئاسمانیی کەرکوکی لە سەرجەم کارمەندانی کەناڵەکە کردووە و ڕایگەیاندووە، “هیوادارم لە ئاست پێویستیی میدیایی ئەمڕۆدا بن، بە بەرنامە و پەیامی پیشەیی و بەرپرسیارانە درێژە بەخزمەتەکانتان بدەن”.
هاوسەرۆکی یەکێتی داواشیان لێدەکات، لەپاڵ ئەرکە میدیاییەکەیاندا “ڕۆڵێکی گرنگ بگێڕن لە قووڵکردنەوەی گیانی پێکەوەژیان لەنێوان ھەموو نەتەوە و پێکھاتەکاندا”.
بافڵ تەڵەبانی ئاماژەی بەوەکردووە، “کەناڵی کەرکوک دیاریی سەرۆک مام جەلال بوو بۆ هەموو دەنگ و ڕەنگە جیاوازەکانی کەرکوک، دەبێت وەک ھەمیشە ڕاگەیاندنێکی بەرپرسیاربێت و لەچوارچێوەی پابەندبوون بە بەھا باڵاکانی ڕۆژنامەوانی پەیامەکانی ئاڕاستەبکات”.
دەشڵێت، “لەم قۆناغەدا بەبەرنامەیەکی نوێوە خزمەتی شارەکەتان بکەن و پارێزگاری لە دەنگی کورد و نەتەوە و پێکھاتە ڕەسەنەکانی کەرکوک بکەن”.
بافڵ تاڵەبانی لە كۆتایی پەیامەكەیدا پشتیوانی و هاوکاریی خۆی بۆ کەناڵەکە دووپاتکردووەتەوە.
