ڕێكخراوی تەندروستیی جیهانی دەڵێت، بە گرنگییەوە چاودێری گۆڕاوێكی دیكەی ڤایرۆسی كۆرۆنا دەكات كە ناوی (مو- MU)ە و بۆ یەكەمجار لە كانونی دووەمی ئەمساڵ لە كۆلۆمبیا دەركەوت.
ڕێكخراوەكە ئاشكرایكرد، گۆڕاوی (مو) ناوە زانستییەكەی بریتییە لە (B.1.621).
گۆڕاوە نوێیەكە دەشێت بەرگریی زیاتری دژ بە ڤاكسینەكان هەبێت، هەروەك چۆن گۆڕاوی (بێتا) هەیبوو، وەك ئەوەی تەندروستیی جیهانی ئاماژەی پێدەدات و پێوایە كە پێویست بە ئەنجامدانی توێژینەوەی زانستی دیكە دەكات بەمەبەستی زانینی تایبەتمەندی و جیاوازییەكانی بەشێوەیەكی باشتر.
بڵاوبوونەوەی جۆرە گۆڕاوە نوێیەكە لە جیهاندا كەمیكردووە كە لەئێستادا بە كەمتر لە 0.1% دەخەمڵێندرێت، بەڵام بڵاوبوونەوەی لە كۆڵۆمبیا زیادیكردووە بەڕێژەی 39% و لە ئیكوادۆر بەڕێژەی 13%.
بەپێی ڕێكخراوی تەندروستی لە ئێستادا چوار جۆری گۆڕاوی كۆرۆنا هەیە كە مایەی نیگەرانین، گۆڕاوی ئەلفا، كە یەكەمجار لە شاری كنت-ی بەریتانی تۆماركرا و لە 193 وڵاتدا بڵاوبووەتەوە، گۆڕاوی بێتا كە لە 141 وڵات بڵاوبووەتەوە، گۆڕاوی جاما لە 91 وڵات و گۆڕاوی دەلتا كە گەیشتووەتە 170 وڵات.
بەمدواییەش ڕێكخراوەكە گۆڕاوی (مو)ی وەك زنجیرەی پێنجەم تۆماركرد، كە پاش دەركەوتنی لە كۆڵۆمبیا لە وڵاتانی دیكەی ئەمریكای باشوور و ئەوروپا بڵاوبووەتەوە و جەختیشیكردەوە لەسەر پێویستیی چاودێریكردنی.
