COVID-22
پێشبینییەکان چی لەبارەوە دەڵێن؟ چی لەبارەوە دەزانیت؟

پسپۆڕانی بواری پزیشکی هۆشداری لەبارەی بڵاوبوونەوەی شەپۆلی چوارەمی COVID-19 بەشێوەیەکی بەربڵاو و سەخت دەدەن، ڕاپۆرتەکان مەترسی سەرهەڵدانی جۆرێکی مەترسیداری ڤایرۆسەکە لە ساڵی 2022دا دەخەنەڕوو، کە نیگەرانییەکی زۆری لای شارەزایانی بوارەکە دروستکردووە.

پێگەی بۆڵدسکای Boldsky-ی تایبەت بە بواری تەندروستی لەزاری پسپۆڕانەوە سەرهەڵدانی ڤایرۆسێکی لە ساڵی 2022دا خستووەتەڕوو، کە مەترسیدارتر دەبێت لە کۆرۆنا و ناوی COVID-22ی لێناوە.

پێگەکە دەڵێت، ڤایرۆسەکە زۆر مەترسیدار و بگرە مەترسیدارترین جۆر دەبێت لەناو سەرجەم زنجیرەکانی دیکەی کۆرۆنادا کە تائێستا جیهان بەخۆیەوە بینیوە، لەگەڵ ئەوەشدا COVID-22 نەخۆشییەکی ڕاستەقینە نییە، بەڵکو تەنها پێشبینییە پزیشکییەکانن.

زانایانی بواری زانستی بەرگریی جەستە لە دامەزراوەی ETH Zurich کە یەکێکە لە بەناوبانگترین دامەزراوە زانستییەکانی سویسرا دەڵێن، پێویستە ئامادەکاری و ڕێکاری توند بۆ ئەو جۆرە نوێیە بگیرێتەبەر کە دەتوانێت ببێتە “مەترسییەکی گەورە”.

ڕێکخراوی تەندروستیی جیهانی تائێستا زاراوەی COVID-22ی بەفەرمی نەناساندووە، زانایانیش جەخت  لە بڵاوبوونەوەی بەردەوامی زنجیرەکانی سارس- کۆڤ- 2 دەکەنەوە.

زاراوەی COVID-22 یەکەمجار لەلایەن دکتۆر ساری ڕیدی پسپۆڕی بەرگریی دەستکرد لە لە پەیمانگای فیدراڵیی سویسری بۆ تەکنەلۆژیا لە زیورخ بەکارهێنرا، بەڵام ڕێکخراوی تەندروستیی جیهانی و سەنتەری چاودێری و ڕوبەڕوبوونەوەی نەخۆشییەکان لە ئەمریکا CDC تائێستا زاراوەکەیان بەفەرمی پەسەندنەکردووە.

پێشبینییەکان سەبارەت بە COVID-22 لای زانایانی پزیشکی دەریدەخەن:

–        COVID-22 مەترسیدارترە لە COVID-19.

–        جیهان پێویستی بە ڤاکسینی زیاتر دەبێت لە ساڵانی داهاتوودا بەهۆی سەرهەڵدانی زنجیرەی جیاوازی ڤایرۆسەکە.

–        توانای بڵاوبوونەوەی لە هەموو جۆرەکانی دیکە زیاتر دەبێت.

–        ئەگەری هەیە زنجیرەیەک سەرهەڵبدات کە بەتەنها ڤاکسین نەتوانێت ڕێگری لێبکات.

–        ئەو پێشبینییانەی ئێستا دەکرێن هاوشێوەی هەمان ئەو پێشبینییانەیە کە پێشتر سەبارەت بە دەلتا کرابوون.

هەموو ئەو جۆرانەی کۆرۆنا كە لەماوەی ڕابردوودا لە COVID-19وە دەرکەوتوون، دەگەڕێنەوە بۆ یەک خێزان و ڕەچەڵەک، ئەویش سارس- کۆڤ- 2ــە، هەریەکە لە گۆڕاوەکانی ئەلفا، بیتا، دەلتا و دەلتا پڵەس لە بنەرەتی سارس- کۆڤ- 2ـــوەوە گۆرانکارییان بەسەرداهاتووە و ئەگەری گۆڕانکاریی گەورە لە پێکهاتەی ڤایرۆسە بنەرەتییەکەدا زۆرتر دەکەن و نیگەرانیی زۆری لای زانایان دروستکردووە.

بابەتی پێشتر

چەند کۆچبەرێکی کورد لەلایەن پۆلیسی یۆنانەوە دەستگیرکراون

بابەتی دواتر

تەقینەوەكەی قادیا.. پارتی دەڵێت بۆمبی پەكەكە بووە و پەكەكەش توركیا تۆمەتبار دەكات

بابەتی پەیوەندیدار
Total
0
Share