لە دوو ڕووداوی جیاوازدا نزیکەی 200 کۆچبەر لەلایەن پۆلیسی یۆنانەوە لە چەند دوورگەیەکدا دەستگیرکراون و 58 کۆچبەریان کوردن.
یەختێکی کۆچبەران کاتێک دەیویست لە تورکیاوە بەبێ بەکارهێنانی خاکی یۆنان بگاتە ئیتاڵیا، بەڵام بەهۆی کێشەیەکەوە لە دوورگەیەکی یۆنان لایداوە و دواتر 120 کۆچبەری تێدا دەستگیرکراوە.
بەپێی زانیارییەکان یەختی کۆچبەرەکان لە دوورگەیەک بەناوی میلۆس (milos) لایداوە و دواتر لەلایەن پۆلیسی یۆنانییەوە کۆچبەرەکان دەستگیرکراون، تا ئێستا نازانرێت شۆفێری یەختەکە بۆچی ئاراستەی گۆڕیوە بەرەو یۆنان.
هاوکات 58 کۆچبەری کورد لەلایەن هێزی دەریاوانیی یۆنانەوە دەستگیرکراون و گواستراونەتەوە بۆ شوێنێکی نادیار.
بڕیارە ئەمڕۆ سێشەممە 31ی ئاب، وەزارەتی دەرەوەی یۆنان زانیاری نوێ لەبارەی ئەو کۆچبەرانەوە بداتە میدیاکان و هاوکات ئەو کۆچبەرانە ئەگەری ناردنەوە و دیپۆرتیشیان لەسەرە.
