وتەبێژی تەندروستیی هەرێم ڕایدەگەیەنێت، ژمارەی توشبووانی نەخۆشی ڤایرۆسی کۆرۆنا بە ڕێژەیەکی بەرز زیادیکردووە و دەشڵێت، “پێشبینیەکان ترسناکن”.
وتیشی، “پێشبینیەکان ترسناکە و پێویستی بە بەشداربوونی هەموو چین و توێژەکانی کۆمەڵگایە بۆ هۆشیارکردنەوەی هاوڵاتییان بۆ خۆپاراستنیان لەم ڤایرۆسە”.
لێدوانی وتەبێژی تەندروستی لەكاتێكدایە بە ئامادەبوون و سەرپەرشتیی سامان بەرزنجی، وەزیری تەندروستی، ئەنجومەنی ڕاوێژکاری پزیشکانی پسپۆڕ و ڕاوێژکار و خاوەن ئەزموون لەگەڵ ڕێکخراوی تەندروستی جیهانی WHO لە کۆبوونەوەدان تایبەت بە ڕەوشی کۆرۆنا لە هەرێمی کوردستان.
دوێنێ وەزارەتی تەندروستیی هەرێم ڕایگەیاند، لەماوەی 24 كاتژمێری ڕابردوودا هەزار و 78 توشبووی نوێ بە كۆرۆنا تۆماركران.
هەروەك كۆی گشتیی ئەو كەسانەی تائێستا لە هەرێمی كوردستان بەهۆی كۆرۆناوە گیانیان لەدەستداوە گەیشتووەتە دوو هەزار و 226 كەس، كە زۆرترینیان لە پارێزگای سلێمانی بوون كە هەزار و 103 كەس گیانیان لەدەستداوە.
