سوپای تورکیا و گروپە چەکدارەکانی سەر بەو وڵاتە چەند گوندێكیان لەسەر ڕێگەی نێودەوڵەتیی حەلەب – حەسەکە تۆپبارانکرد و تۆڕی کارەبای سنوورەکە زیانی بەرکەوت.
ڕوانگەی سوری بۆ مافەکانی مرۆڤ بڵاویکردەوە، سوپای تورکیا و گروپە چەکدارەکانی ئەمڕۆ چوارشەممە بە هاوەن گوندەکانی تهل وەرد، باب خەیر و تهل شامیران-یان لە شارهدێی زڕگانیبا لە باکووری حەسەکە تۆپبارانکردووە.
باسی لەوەشكردووە، ئەنجومەنی سەربازیی تهل تەمر بۆ وەڵامدانەوەی تۆپبارانەکە ژمارەیەک پێگەی گروپە چەکدارەکانی تۆپبارانكردووە، لەئەنجامیشدا چەند ماڵێکی گوندەکان و تۆڕی کارەبای تهل تەمر زیانیان بەرکەوت.
پێشتر ئیلهام ئەحەمد هاوسەرۆکی دەستەی بەڕێوەبەریی ئەنجومەنی سوریای دیموکرات (مەسەدە) داوای لە ڕوسیا و ئەمریکا كردبوو ئەرکی خۆیان بۆ ڕاگرتنی هێرشەکان و پاراستنی ڕێککەوتنی ئاگربەست جێبەجێبکەن.
