قوباد تاڵەبانی جیگری سەرۆکی ئەنجومەنی وەزیران ڕایدەگەیەنێت، “باوەڕی تەواومان بەوەیە کە دەبێت دامودەزگاکانی حکومەت ڕێكبخرێنەوە لەسەر بنەمای دامەزراوەیی بۆ باشتر خزمەتکردنی هاوڵاتییان و جیبەجێکردنی پلانەکانی چاکسازیی حکومەت.”
قوباد تاڵەبانی جێگری سەرۆکی ئەنجومەنی وەزیران، ئەمڕۆ سێشەممە لە هەولێر، بە ئامادە‌بوونی سە‌رۆكی دیوانی ئەنجومەنی وەزیران، لەگەڵ بریکاری وەزارەتەکان و سەرۆکی دەستەکانی حکومەتی هەرێمی کوردستان کۆبووەوە بەمەبەستی گفتوگۆکردن لەبارەی چۆنییەتی ڕێکخستنەوەی کاروباری دامودەزگاکانی حکومەت لەسەر بنەمای شۆڕكردنە‌وە و دیاریکردنی دەسەڵاتەکان و دروستکردنی پەیوەندیی پتەوتر لەنێوانیاندا.
بەگوێرەی ڕاگەیەندراوی كۆبوونەوەكەش، جێگری سەرۆکی ئەنجومەنی وەزیران تیشکی خستەسەر گرنگیی بەکارهێنانی تەواوی دەسەڵاتەکان بە هەماهەنگیی وەزیرەکان لەسەر بنەمای یاسا و ڕێنماییەکان بۆ جێبەجێکردنی پلانەکانی چاکسازی لەهەموو سێکتەرەکاندا.
لە بەشێکیتری کۆبوونەوەکەدا ئامادەبووان باسیان لە پرسی شۆڕکردنەوەی دەسەڵاتەکان کرد لەلایەن وەزیرەکانەوە و چۆنییەتی گونجاندنیان لەگەڵ پێگەکانیان بۆ جێبەجێکردنی پلانەکانی چاکسازیی حکومەت.
هەر بەپێی ڕاگەیەندراوەكە، “لە کۆبووەنەوەكەدا جەخت لەوەكرایەوە پێویستە سوود لە ئەزموون و توانای بریکارەکان و دەستەکان وەربگێرێت لە ئەنجومەنەکانی (ئابوری، چاکسازی، نەوت و غاز و وەبەرهێنان).
