وه‌زاره‌تی په‌روه‌رده‌ی حكومه‌تی هه‌رێمی كوردستان، بڕیاریدا وه‌رگرتنی خوێندكاران له قوتابخانه بنه‌ڕه‌تی و ئاماده‌ییه‌كان بۆ ساڵی خوێندنی 2021-2022 له‌سه‌ر بنه‌مای شوێنی جوگرافی بێت.
بەپێی نووسراوێكی وەزارەتەكە، كه واژووی ئالان حه‌مه‌سه‌عید وه‌زیری په‌روه‌رده‌ی له‌سه‌ره، “وه‌رگرتنی خوێندكاران له سه‌رجه‌م قوتابخانه بنه‌ڕه‌تی و ئاماده‌ییه‌كان بۆ ساڵی خوێندنی 2021-2022 ته‌نها له‌سه‌ر بنه‌مای شوێنی جوگرافی ده‌بێت”.
ڕوونیشیكردووەتەوە، به‌هیچ شێوه‌یه‌ك پێوه‌ره‌كانی (نمره، تیروپشك و چاوپێكه‌وتن.. هتد) نابنه بنه‌مای وه‌رگرتن، كاتێك به‌پێی ڕیزبه‌ندیی خۆتۆماركردن توانای وه‌رگرتنی قوتابخانه‌یه‌ك ته‌واو ده‌بێت، خوێندكارانی زیاد، له نزیكترین قوتابخانه‌ی دیكه مافی خۆتۆماركردنیان ده‌بێت.
ئەوەش لەكاتێكدایە، بڕیارە 14ی ئه‌یلول خوێندنی ساڵی نوێ ده‌ستپێبكات.
