وەزارەتی دەرەوەی ئۆکرانیا ئاشکرایکرد، لە چەند ڕۆژی ڕابردوودا، فڕۆکەیەکیان، کە بۆ گەڕانەوەی ئۆکرانییەکان لە ئەفغانستان دابینکرابوو، لەلایەن کەسانی نەناسراوە ڕفێندراوە بەرەو ئێران.
وەزارەتی دەرەوەی ئۆکرانیا باسی لە هۆکاری ڕفاندنی فڕۆکەکە و وردەکارییەكەی نەکردووە، بەڵام ئاماژەی بەوەکردووە، فڕۆکەکە بەرەو شاری مەشهەد لە ئێران ڕۆشتووە.
لای خۆیەوە دامەزراوەی فڕۆکەوانیی ئێرانی لە ڕاگەیەندراوێکدا هەواڵی ڕفاندنی فڕۆکەیەکی ئۆکرانی بەرەو ئەو وڵاتە ڕەتکردووەتەوە و بێئاگایی خۆی لەو ڕووداوە ڕاگەیاندووە.
بەلام سەرچاوەیەکی ئاگادار لە فڕۆکەخانەی مەشهەدەوە ئاشکرایکردووە، “بەڵێ فڕۆکەکە گەیشتووەتە فڕۆکەخانەی مەشهەد و داوای بەنزینی کردووە و پاشان لە دەرفەتێكدا فڕیووەتەوە.
بەهۆی ئەو دۆخە ئاڵۆزەی دوای کەوتنی حکومەتی ئەفغانستان و گەڕانەوەی چەکدارانی تاڵیبان لە فڕۆکەخانەی “حامید کارزای” لە کابول دروستبووە، ڕۆژانە ئاڵۆزی و شەڕ و کوشتن دەبینرێت و خەڵکێکی زۆر دەیانەوێت بەهەر نرخێک بێت وڵات جێبهێڵن.
