یانەی مانچستەر سیتی پێویستی بە داهاتێکی زیاترە بۆ کڕینی هاری کەین، بۆ ئەو مەبەستەش یەکێک لە یاریزانە گرانبەهاکانیان خستووەتە لیستی فرۆشتنەوە.
بەپێی ئەو زانیارییانەی لەلایەن ڕۆژنامەی مارکای ئیسپانییەوە بڵاوکراوەتەوە، ئایمیریک لاپۆرت لە یاریزانێکی سەرەکی و گرنگی پێکهاتەی مانچستەر سیتییەوە بووەتە یاریزانێکی یەدەگ، پێپ گواردیۆلا سەرنجی خستووەتە سەر ڕۆبن دیاس و جۆن ستۆنز، لە ئێستاشدا بیر لە فرۆشتنی بەرگریکارە ئیسپانییەکە دەکەنەوە.
سەرچاوەکە نووسیویەتی، چەندین یانەی وەک ڕیاڵ مەدرید و چێڵسی گرنگییان بە لاپۆرت داوە، پێیانوایە داهاتوویەکی پرشنگداری لە پێکهاتەی ئیسپانیا و هەر یانەیەکی دیکەدا دەبێت کە یاری بۆ دەکات، لە بەرامبەردا سیتی نرخی گواستنەوەی بە 70 ملیۆن یورۆ خەمڵاندووە.
هۆکاری ناونووسکردنی لاپۆرت لە لیستی فرۆشتندا پەیوەندی بە گواستنەوەی هاری کەینەوە هەیە، کە 150 ملیۆن پاوەندی پێویست دەبێت، جگە لە تێچووی گواستنەوەکە کە بڕێکی زۆرە، لەهەمان کاتدا بەهۆی موچە بەرزەکەیەوە هەڵئاوسانێک لە لیستی موچە و بەکارخستنی یانەکەدا دروستدەکات، بۆیە ناچاردەبن یەکێک لە گرانبەهاکان بفرۆشن.
