ئیڵەن مەسك سەرۆكی جێبەجێكاری كۆمپانیای “تێسلا” ئاشكرایكرد، ڕۆبۆرتێكیان دروستكردووە هاوشێوەی مرۆڤە، بەڵام كاری مەترسیدار ڕادەپەڕێنێت.
ئەو ڕۆبۆتەی كە ئەمڕۆ هەینی 20ی ئاب ئیڵەن مەسك دروستكردن و خستنەڕووی ڕاگەیاند، ناوی “تێسلا بۆت”ـە و لەشێوەی مرۆڤ دروستكراوە، ئەركی ڕاپەڕاندنی ئەو كارانە دەبێت كە “مەترسیدار و وەڕسكەرن و مرۆڤ حەز بە ڕاپەڕاندنیان ناكات”.
سەرۆكی جێبەجێكاری كۆمپانیای “تێسلا” وتیشی، “بەرزیی باڵای ڕۆبۆتەكە 176 سانتیمەترە و بەشێك لە كارەكانی ئەوەن كە دەتوانێت برغووەكانی ئۆتۆمبێل بە ئیسپانە ببەستێت و كاری شمەك كڕین بۆ خاوەنەكەی ڕابپەڕێنێت و سەوزە و میوەی بۆبكڕێت”.
لەبارەی نرخی ڕۆبۆتی “تێسلا بۆت”ـەوە، ئیڵەن مەسك سەرۆكی جێبەجێكاری كۆمپانیای “تێسلا” رایگەیاند، كارێكیان كردووە نرخی ئەو ڕۆبۆتە گران نەبێت و وتی، “ڕۆبۆتەكە گۆڕانكارییەكەی ئابوریی گەورە دروستدەكات، چونكە بەهۆیەوە كەسانێك بێكار دەبن”.
