پەرلەمانتارێکی پەرلەمانی کوردستان پڕۆژەیەک بۆ شەقامی 100 مەتری سلێمانی ڕادەگەیەنێت و دەڵێت، لە جێگەی ئەوەی چواردەوری شەقامەکە بکرێت بە جەمەلۆن و کۆگا، بە ماستەر پلانێک بکرێت بە شارێکی هاوچەرخ.
عەلی حەمە ساڵح، پەرلەمانتاری بزووتنەوەی گۆڕان ڕایگەیاند، ” شەقامی 100 مەتری پرۆژەیەکی ستراتیژیە بۆ سلێمانی، بەڵام بەھاو گرنگی و کاریگەری زەوییەکان بەھەردوو ئاراستەی شەقامەکە، کە ھەزاران دۆنمە زۆر لە شەقامەکە گرنگترن و ئەم زەویانە لە شوێنێکی گرنگی ستراتیژین، ڕوبەرو و ھەڵکەوتەی زەویەکە ھی بونیادنانی شارێکی مۆدێرنە، بۆیە لە بری ئەوەی بکرێتە مەخزەن و جەمەلۆن و داگیرکاری، دەتوانرێت بە ماستەر پلانێک سلێمانیەکی ھاوچەرخ بونیات بنرێت”.
ئەو پەرلەمانتارە دەشڵێت، ” بونیادنانی ئەم شارە مۆدێرنە نەک ھیچ بڕە پارەیەکی پێویست نیە، بەڵکو دەتواندرێت بڕە پارەیەکی ئێجگار زۆریشی بۆ خزمەتگوزاریی سلێمانیەکی مۆدێرن دابین بکات، هاوکات ئەم پرۆژە تەنیا جوانکردنی سلێمانی نیە، بڵکو دروستکردنی جوڵەیەکی گەورەی بازرگانی و گەشتیاریشە”.
شەقامی 100 مەتری سلێمانی لە قۆناغی یەکەمدا بە درێژایی 32 کیلۆمەتر دروست دەکرێت و لە ئێستا %42ی کارەکانی تەواو بووە.
