وەزارەتی بەرگریی توركیا شەهیدەكانی شەنگال بە گەریلای پەكەكە ناودەبات و باس لە 10 “كوژراو” دەكات.
وه‌زاره‌تی به‌رگریی توركیا لە تویتەرەوە ڕاگەیەندراوێكی بڵاوكردووەتەوە، دەڵێت، “له میانی ئۆپه‌راسیۆنێكی ئاسمانییدا، 10 تیرۆریستی په‌كه‌كه كه پێشتر شوێنه‌كانیان ده‌ستنیشان كرابوون له شەنگال له چالاكی خران”.
ئەمە لەكاتێكدا دوێنێ ئەنجومەنی خۆبەڕێوەبەریی شەنگال ئاشكرایكرد، لە ئەنجامی هێرشەكەی سەر نەخۆشخانەی گوندی سکێنێ، هەشت کەس شەهید و چواری دیکەش برینداربوون، “لەو هەشت کەسەی شەهیدبوون، چواریان شەڕڤانی یەبەشە-ن، کە لەنەخۆشخانەکە تیمار دەکران، هەروەها سێ لە شەهیدەکان، کارمەندی تەندروستی بوون، کە خزمەتی کۆمەڵگای ئێزدییان دەکرد، شەهیدەکەی دیکەش خەڵکی شاری شرناخی باکووری کوردستانە و لە فەرمانی 2014-دا، کاتێک بانگەوازیی سەفەربەربوون کرا، بۆ ئەوەی بریندارەکانی کۆمەڵگای ئێزدیی دەرمان بکات، وەکو پزیشک هاتبوو بۆ شەنگال و لەو کاتەوە خزمەتی تەندروستیی پێشکەش بە خەڵکی شەنگال دەکرد”.
ئەنجومەنەكە لەبارەی بریندارەكانیشەوە، كە چوار كەسن، ڕایگەیاندبوو، سەرجەمیان کارمەندی تەندروستیی بوون.
