دوای کۆنترۆڵکردنی کابولی پایتەختی ئەفغانستان لەلایەن تاڵیبانەوە، وڵاتی هیندستان باڵیۆزخانەکەی لە کابول داخست و کارمەندەکانی گەڕاندەوە وڵاتەکەی، بەوەش ئێستا تەنها سێ باڵیۆزخانە لەناو ئەفغانستاندا ماونەتەوە.
هیندستان درەنگانێکی شەوی ڕابردوو بە فڕۆکەیەکی تایبەت، کۆی کارمەندان و بەڵگەنامەکانی باڵیۆزخانەکەی لە کابولی پایتەخت گواستەوە بۆ ناوخۆی وڵات.
ئێستا لەناو ئەفغانستاندا تەنها باڵیۆزخانەکانی ڕوسیا، چین و پاکستانی تێدا ماوە و ئەو سێ وڵاتەش تا ئێستا بۆچوونیان لەسەر تاڵیبان نەرمە.
وڵاتی ئیندۆنیسیاش لای خۆیەوە ڕایگەیاندووە، “ئەرکی دیپلۆماتکاریی بچووک” لە ئەفغانستان دەهێڵێتەوە، بەڵام باڵیۆزخانەکەی داخستووە.
ڕوسیاش ئاشکرایکردووە، تەنها بەشێک لە باڵیۆزخانەکەی چۆڵدەکات، بەڵام ئەرکەکانی لە کابول بەردەوامی پێدەدات و بڕیارە ئەمڕۆ “دیمتری ژیرنۆڤ” باڵیۆزی وڵاتەكە لە ئەفغانستان، لەگەڵ نوێنەرێكی باڵای تاڵیبان کۆبێتەوە.
باڵیۆزخانەی چین هیچ ڕاگەیەندراوێکی لەبارەی داخستنەوە بڵاونەکردووەتەوە، بەڵام بە چینییەکانی ناو ئەفغانستانی وتووە لەم بارودۆخەدا زیاتر ئاگاداری خۆیان بن.
