ڕووداوێكی هاتوچۆ لە گەرمیان لەنێوان ئۆتۆمبێلێكی بچوك و بارهەڵگرێكدا ڕوویدا و پۆلیسی ناوچەكە دەڵێت، بەهۆیەوە ژنێك گیانیلەدەستداوە و هاوسەرەكەشی برینداربووە.
عەلی جەمال قدوری، بەرپرسی ڕاگەیاندنی پۆلیسی گەرمیان ڕایگەیاند، ئێوارەی ئەمڕۆ لەسەر ڕێگای گوندی گاکوڵ-صاڵح ئاغا ڕووداوێکی پێکدادان لەنێوان دوو ئۆتۆمبێل لەجۆرەکانی (جێب و ترێلە)دا ڕوویدا.
لە ئەنجامی ڕووداوەكەدا ژنێك بەناوی (شنۆ لوقمان فەرەج) لەدایکبووی 1998 دانیشتووی کەلار کە سەرنشینی جێبەکە بوو گیانیلەدەستدا و شۆفێرەکەشی کە هاوسەری قوربانییەكەیە بە سەختی برینداربوو.
عەلی جەمال ئەوەشی خستەڕوو، بریندارەكە دوای گەیاندنی بە بەشی فریاکەوتنی شەهید هەژار لە کەلار و چارەسەری پێویست بەهۆی سەختی برینەکەیەوە ڕەوانەی نەخۆشخانەی سلێمانی کرا، شۆفێر بارهەڵگرەكەش بە بڕیاری دادوەر و بەپێی مادەی 24ی هاتووچۆ بەندکرا.
