ئاژانسی ڕۆیتەرز لە زاری بەرپرسانی بزوتنەوەی تاڵیبانەوە كۆنترۆڵكردنی شاری جەلال ئابادی لە ڕۆژهەڵاتی ئەفغانستان ڕاگەیاند.
بەپێی ئاژانسەكە دەستبەسەراگرتنی شارەكە بەبێ شەڕ بەیانی ئەمڕۆ بووە و بەهۆیەوە ئەو ڕێگایەی ئەفغانستان بە پاكستانەوە دەبەستێتەوە كەوتووەتە دەست چەكدارانی بزوتنەوەی تاڵیبان.
بەرپرسێكی ئەفغانی نیشتەجێی جەلال ئاباد ڕایگەیاند، “لەئێستادا هیچ ڕوبەڕوبوونەوەیەك لە جەلال ئاباد-دا نییە، بەهۆی ئەوەی حاكمی ناوچەكە ڕادەستی تاڵیبان بووە” و وتی، “ڕێگەدان بە تێپەڕبوونی تاڵیبان تاكە ڕێگابووە بۆ ڕزگاركردنی گیانی كەسانی مەدەنی”.
بەپێی سەرچاوەیەكی ئەمنیش لە شارەكە تاڵیبان ڕەزامەندی داوە لەسەر ڕێگەدان بە ڕێڕەوێكی پارێزراو بۆ بەرپرسانی حكومەت و هێزە ئەمنییەكان لەكاتی جێهێشتنی جەلال ئاباد.
دەستبەسەراگرتنی جەلال ئاباد لەلایەن چەكدارانی تاڵیبانەوە مانای گەمارۆدانی كابول-ی پایتەخت دەگەیەنێت.
پاش ئەوەی دوێنێ شاری مەزار شەریف لە باكووری ئەفغانستان كەوتە دەست چەكدارانی تاڵیبان، بەپێی هەندێك لە ڕاپۆرتەكان بزوتنەوەكە 90%ی خاكی وڵاتەكەی كەوتووەتە دەست.
