سەرۆكی عەشیرەتی هەركی پەیامێك بڵاودەكاتەوە و داوادەكات لە هەڵبژاردنی تشرینی یەكەمی داهاتوودا دەنگ بە لیستی هاوپەیمانیی كوردستان بدەن.
شێخ جەوهەر محێدین ئاغای هەركی، سەرۆكی عەشیرەتی هەركی پەیامێكی بڵاوكردەوە و تیایدا دەڵێت، “كۆمەڵانی خەڵکی کوردستان، خۆشەویستانمان لە عەشیرەتی هەرکی و ئازیزانم لە عەشیرەتەکانی دۆست و نزیک بەپێویست و گرنگی دەزانم کە داوا لە بەڕێزتان بکەم لە هەڵبژاردنی ئەنجومەنی نوێنەرانی عێراق کە بڕیاروایە لە (10ی تشرینی یەکەمی 2021) بەڕێوەبچێت، بەشدارییەکی کارابکەن و دەنگبدەن بە لیستی هاوپەیمانیی کوردستان کە لەلایەن برای بەڕێزمان (قوباد تاڵەبانی)یەوە سەرۆکایەتی دەکرێت”.
دەشڵێت، “ئەم هەڵبژاردنە مێژووییە و دەتوانین پێگەی گەلەکەمان لە عێراق-دا بچەسپێنین و مافە بەدینەهاتووەکانمان بەدەستبهێنین. تاکە ڕێگاش متمانەکردنە بە لیستی هاوپەیمانیی کوردستان کە بە هاوپەیمانی (یەکێتیی نیشتمانیی کوردستان و بزووتنەوەی گۆڕان) پێکهاتووە. بۆیە ئەرکێکی پیرۆزی مرۆیی، نەتەوەیی، ئایینییە کە پێکەوە کاربکەین بۆ سەرخستنی نەتەوەکەمان و هاوپەیمانیی کوردستان بە دەنگێکی بەهێز و زۆرەوە سەربخەین”.
سەرۆكی عەشیرەتی هەركی جەختدەکاتەوە و ڕایدەگەیەنێت، “خەڵکی خۆڕاگر و تێکۆشەری دەڤەری بادینان و هەروەها ئازیزانمان لە سنووری پارێزگاکانی موسڵ و هەولێر دڵنیادەکەینەوە کە (یەکێتیی نیشتمانیی کوردستان) وەک هەمیشە پارێزەری تەبایی و یەکڕیزیی نەتەوە و ئایین و مەزهەبە جیاجیاکانی کوردستان و عێراقە، متمانەی تەواومان بە کار و بەرنامە چاکسازییەکانی هەڤاڵ و برامان کاک (بافڵ تاڵەبانی) هەیە، بۆیە بە جۆش و خرۆشەوە بەرەو سندوقەکانی دەنگدان بڕۆن و دەنگ بە کاندیدەکانی یەکێتی لەناو لیستی هاوپەیمانیی کوردستان بدەن”.
دووپاتیشیدەكاتەوە، بۆ هەمیشە لەگەڵتان دەبین و ئێوەش ویژدانتان ئاسوودەبکەن و لەگەڵ لیستی هاوپەیمانیی کوردستان بن.
