قوباد تاڵەبانی جێگری سەرۆکی ئەنجومەنی وەزیران، بەبۆنەی یادی 45 ساڵەی دامەزراندنی حزبی سۆسیالیست دیموکراتی کوردستان-ـەوە، پەیامێكی ئاڕاستەی سكرتێر و ئەندامانی مەکتەبی سیاسی و سەرکردایەتیی ئەو حزبە كرد.
لە پەیامەكەیدا قوباد تاڵەبانی سەرباری پیرۆزباییكردن، ڕایگەیاندووە، “جەختدەکەینەوە لەسەر تەبایی و پەیوەندیی دۆستانە و بەهێزی نێوان هەموو لایەنە سیاسییەکانی کوردستان لەپێناو بەدیهێنانی ماف و ئامانجە باڵاکانی گەلی کوردستان و بەهێزکردنی پێگەی کورد لە عێراقی فیدراڵدا”.
جێگری سەرۆكی ئەنجومەنی وەزیران جەخت لە بەرەنگاربوونەوەی گەندەڵی دەكاتەوە و دەڵێت، “پابەندیی خۆمان دووپاتدەکەینەوە لە بەرەنگاربوونەوەی گەندەڵی و بەهەدەردانی سامانی وڵاتەکەمان بە هاوکاریی سەرجەم لایەنەکان لە پێناو حوکمڕانییەکی سەرکەوتوو و گێڕانەوەی متمانە بۆ هاووڵاتییان”.
دەقی پەیامەكە:-
بەڕێز کاک محەمەدی حاجی مەحمود
بەڕێزان ئەندامانی مەکتەبی سیاسی و سەرکردایەتیی حزبی سۆسیالیست دیموکراتی کوردستان
بەبۆنەی یادی 45 ساڵەی دامەزراندنی حزبە تێکۆشەرەکەتان، پیرۆزباییەکی گەرم لە سەرجەم ئەندامان و لایەنگران و سکرتێر و مەکتەبی سیاسی و سەرکردایەتیی حزبی سۆسیالیست دیموکراتی کوردستان دەکەم، هیوای سەرکەوتنتان بۆ دەخوازم.
لەم یادەدا جارێکیتر جەختدەکەینەوە لەسەر تەبایی و پەیوەندیی دۆستانە و بەهێزی نێوان هەموو لایەنە سیاسییەکانی کوردستان لەپێناو بەدیهێنانی ماف و ئامانجە باڵاکانی گەلی کوردستان و بەهێزکردنی پێگەی کورد لە عێراقی فیدراڵدا. پابەندیی خۆشمان دووپاتدەکەینەوە لە بەرەنگاربوونەوەی گەندەڵی و بەهەدەردانی سامانی وڵاتەکەمان بە هاوکاریی سەرجەم لایەنەکان لە پێناو حوکمڕانییەکی سەرکەوتوو و گێڕانەوەی متمانە بۆ هاووڵاتییان.
یادی دامەزراندنی حزبی سۆسیالیست دیموکراتی کوردستان پیرۆزبێت و هەر لە پێشکەوتن و گەشەکردندا بن.
قوباد تاڵەبانی
جێگری سەرۆکی ئەنجومەنی وەزیران
